Ота - устоз

Чин адабиёт ҳамиша инсоннинг ички маънавий эҳтиёжидан, яъни кўнглидаги ўй-хаёлларини, ҳис-туйғуларини, дардини атрофдагиларга изҳор қилиш, сўз орқали ифодалаш, сўз айтиш баробарида теварак оламни, ўз ҳаётида юз бераётган воқеаларни қалб кўзи билан идрок этиш; мавжуд макон ва замонда ўзини, ўзлигини кашф этиш орқали муайян ҳаётий хулосаларга келишга, шунингдек, ўз тутган йўлини, шахсий хулосаларини, ўй-хаёлларини шарҳлаб беришга, уларни изчил равишда тарғиб этишга бўлган қалб эҳтиёжидан туғилади. Шу маънода ҳар бир асар муайян шахснинг даврга, замондошларига ва умуман ўзи мансуб ва иштирокчи бўлган ҳаётга нисбатан муносабатидир.Нуриддин Муродов ҳикоялари баён услубининг равонлиги, ҳаётийлиги, ўқувчини турмушнинг турли чигал вазиятларида тўғри хулоса чиқара олишга чорлаши, самимийлиги билан эътирофга сазовор. Айнан шу жиҳатларни ижодкорнинг ушбу китобга кирган шеърларида ҳам кузатиш мумкин.