Алмаас уонна хара дьай
Рафаэль Багатаайыскай
Бу – саха народнай поэта Рафаэль Баҕатаайыскай 2008–2009 сыллардаахха суруйбут «Хара дьай» диэн трагедиятыгар олоҕурбут сэһэн. Айымньыга Саха сиригэр алмаас уонна көмүс үлэтигэр ХХ үйэҕэ, чуолаан, 1960-с сыллар ортолоруттан 1980-с сыллар саҕаланыыларыгар диэри кэрчик кэми хабан, араас улуустарга буолуталаабыт түбэлтэлэр аттарыллан, биир сүрүҥҥэ киллэриллэн, уус-ураннык ойууланаллар. Геройдара эмиэ – хастыы да киһиттэн түмүллэн оҥоһуллубут-таҥыллыбыт уобарастар. Онон чопчу дьону көрдүүр оруна суох.
Ааҕааччы киэҥ араҥатыгар ананар.
Рафаэль Багатаайыскай , Афанасий Арчылан
Алмаас уонна хара дьай
Алмаас уонна хара дьай
Лучше жить бедняком, чем разбогатеть с грехом.
1
Дьокуускай. Сайыҥҥы ып-ыраас күн сарсыардата. Үлэҕэ барыы үгэнэ. Дзержинскэй уулуссатын туораары үөмэхтэһэн турааччы дьон, күөх уот умайаатын кытта, бары биир киһи курдук уҥуор таластылар. Арай маҥан сэлээппэлээх биир хатыҥыр эмээхсин массыыналартан урут турар «шашка» ойуулаах бороҥ өҥнөөх «Волгаҕа», сэрэн диэбиттии, сөмүйэтин чочоҥолотон, суол ортотугар бытаара сырытта. Мылайбыт кэтит сирэйдээх таксист ол аайы, хата, кыһаллан да бэрт – ылгын чыкыйынан, сүрэҕэлдьээбиттии, барбах, муннун эрэ хастар. Тахсыбыт дьон сорох өттө почтамт диэки туораары, эмиэ светофору өрө мыҥаата. Оттон баһыйар үксүлэрэ оптуобус тохтобулун диэки тиэтэйэ-саарайа хаамтылар. Кинилэри кытта бииргэ барсан испит бороҥ көстүүмнээх, хара ачыкылаах, уурбут-туппут курдук көрүҥнээх киһи эмискэ арахсан, эрчимнээхтик туора хааман, улахан халҕаны арыйаат, таас уораҕайга ньимис гынан хаалбытын өйдөөбөккө да хааллылар быһыылаах.
Саха АССР Государствоҕа куттал суох буолуутун кэмитиэтин промышленноска уонна экономикаҕа салаатын начальнига подполковник Чистяков ыҥыртаран ылбыт киһитин, Соттинцевы, чинчийэрдии сыныйан көрө-көрө, күөх сукуна бүрүөһүннээх остуолун хаҥас өттүгэр ыкса олорорго ыҥыран, эттээх халыҥ ытыһын нэлэс гыннарда.
– Михаил Михайлович, туохха ыҥыртарбыппын эн, бука, сэрэйэр инигин?
– Сүнньүнэн сэрэйэбин.
Чистяков, эмиэ тонолуппакка одуулуу-одуулуу, салгыы биир кэмник саҥаран барда:
– Көмүс бириискэлэригэр чекист быһыытынан үчүгэйдик үлэлээбиккин билэбит. Онно олоҕураммыт, аны Севернэйдээҕи хайа комбинатыгар ыытарга быһаардыбыт. Чекист быһыытынан. Ол – эн кистэлэҥ үлэҥ. Аһаҕас, көстөр-биллэр дьарыгыҥ – комбинат генеральнай дириэктэрин солбуйааччы. Партия обкома сөбүлэҥин биэрдэ. Кэмитиэт бэрэссэдээтэлэ генерал Горлицын дьаһалга хайыы-үйэ илии баттаата.
– Өйдөөтүм, табаарыс подполковник, – Соттинцев барбах кэҕис гынна, Чистяков биэрбит кумааҕытын ааҕан баран, илии баттаан эрилиттэ.
– Севернэйгэ алмааһы уоруу тохтообот. Силиһэ дириҥ быһыылаах. Биир союзнай республикаҕа тиийэ барар курдук. Ону арыйар сорудаҕы толорооччулартан биирдэстэринэн эн буоллуҥ. Уоруйахтар олус киитэрэйдэр. Туохха да ылбычча киирэн биэрбэт кырдьаҕас бөрөлөр курдуктар, – Чистяков күп-күөх харахтара, «саарбахтаама даҕаны» диэбиттии, уоттанан ыллылар, онтон мүчүк гынаат, салгыы саҥаран барда. – Оттон эн, булчут саха удьуора, бөрөлөөх дойду киһитэ, хапкааны хайдах мэҥиэлээн, ханна иитэри билиэҥ диэн эрэнэбит. Онно «киинтэн» эмиэ киһи баара сэрэйиллэр. Кыһалҕа үөскээтэ даҕаны, эйигин булуохтара. Быһата, «биир төбө үчүгэй, икки төбө оннооҕор ордук» диэн.
– Эһиги ааспыт да өттүгэр опердарга мэлдьи көмөлөһөр этигит. Онон уустук быһыыга соҕотох хаалыам суоҕа диэн эрэнэн туран сөбүлэһэбин.
– Эппитим курдук, эн онно хайа специалиһын эрэ быґыытынан көстүөхтээххин.
– Севернэй прокурорун кытта оскуолаҕа бииргэ үөрэммитим. Чугас доҕорум. Киниттэн сокуон өттүнэн сүбэлэтиэхпин сөп дуо?
– Адьас көҥүллэммэт. Прокурор да киһи буоллаҕа. Холуочуйан эҥин баран айахтатан кэбиһиэн сөп. Доҕордоһуу диэн доҕордоһуу, үлэ диэн үлэ. Эйиэхэ бэриллибит сорудах – чып кистэлэҥ. Эн арыгыны испэккин дии?
– Суох. Ол эрээри, сорох киһи ис санаатын итирдэҕинэ эрэ аһар ээ. «Өйдөөх мэйиитигэр сылдьар санаа – итирик тылын төрдүгэр баар» дииллэр.
– Ол ханна, кими кытта иһэртэн тутулуктаах буолуоҕа. Оттон алмаас уоруйахтара ити өттүгэр дьиҥнээх «саһыллар». Отой судургутук киирэн биэриэхтэрэ суоҕа. Хата, кэргэниҥ хайдаҕый?
– Махтал. Үчүгэй. Кини – мин уҥа илиим. Көмүскэ Аллаах Үүнүнэн уонна Өймөкөөнүнэн сырыттахпына, хата, үгүстүк көмөлөспүтэ. Оннооҕор биир түгэҥҥэ уоруйахтар эргимтэлэригэр баар дьахталлары кытта билсэн, элбэх кистэлэҥнэрин билэн турар.
– Ол аата үчүгэй! Мындыр кэргэннээх эбиккин. Чекист кэргэнэ эмиэ чекист буолуохтаах, – Чистяков буспут сугун курдук хараҕынан сылаастык көрөр.
– Чэ, көрүөҕүм, – Соттинцев биллэ-биллибэттик үөһэ тыынан ылар. – Бу сырыыга көмөлөһөр кыаҕа тиийэрэ дуу, суоҕа дуу? Бөрөлөр, саһыллар… Адьырҕалары оннооҕор булчут сонордуура уустук. Бэйэтин былдьатыан сөп…
– Оннук. Олус уустук өттүгэр кытыара сатыаҥ суоҕа буоллаҕа дии. Биһиги үлэбит ымпыга-чымпыга, иирбэтэ-таарбата үгүс. Сорох түгэни сыыһа даҕаны өйдүөн эмиэ сөп.
– Инньэ гынан көрүөм.
– Михаил Михайлович, хата, алмаасчыттар ортолоруттан кистэлэҥ агеннарда була сатаа. Бастаан, чинчийэн, күүскэ үөрэтэн, сылыктаан, тургутан баран. Кубулҕакка түбэһэн хаалыаҥ. Биһиги сэрэйиибитинэн улахан бөлөҕүнэн уораллар быһыылаах.
– Генеральнай дириэктэри кытта хайдах сыһыаннаһабыный?
– Үлэ быһыытынан. Специалист эрэ курдук.
– Кини уоруйахтары кытта ситимэ суох ини?
Чистяков, хонойо түһээт, тиэрэ түһэн олорон, илиилэрин даллатан, икки ытыһын нэлэс гыннарар:
– Дьэ, ону чопчутун билбит суох. Барыта үчүгэйгэ дылы. Ол эрээри, «чуумпу чүөмпэҕэ абааһылар уйаланаллар» диэн өс номоҕун умнарбыт сатаммат.
– Сибээһи хайдах олохтуубун?
– Эмиэ урукку үгэспитин салгыыбыт. Эн миигин билбэккин, мин эйигин билбэппин.
– Оччоҕо төлөпүөн көҥүллэммэт?
– Суох, табаарыс капитан.
– Оттон сүбэлэтэ, быһаарса охсор суһал кыһалҕа үөскээтэҕинэ хайыыбын?
– Онно да миэхэ быһаччы тахсыбаккын. Баҕар, уоруйахтар төлөпүөнү кистээн истэр тэриллээх тас дойдулар кистэлэҥ сулууспаларын кытта ситимнээх буолуохтарын сөп. Оннуктар баалларын кыл түгэҥҥэ да умнуо суохтаахпыт. Алмаас промышленноһыгар интэриэс олус улахан. Онон сибээһи обком нөҥүө эрэ олохтуохтаахпыт. Миряев – өйдөөх уонна чиҥ майгылаах киһи. Бэйэтэ сэрии кэмигэр Кытайга кистэлэҥ үлэҕэ сылдьыбыта… Дьэ, олус улахан кыһалҕа үөскээтэҕинэ эрэ, обкомҥа партийнай хайысханан эбэтэр промышленность министиэристибэтигэр наадыйбыт аатыран, командировкаҕа кэлиэхтээххин. Уонна туох ыйытыылардааххын?
– Билиҥҥитэ бүттүм.
– Чэ, сөп. Аны мин эйиэхэ промышленноска сыһыаннаах кистэлэҥ үлэ саҥа ньымаларын уонна биһиги илиибитигэр баар информацияны кытта билиһиннэриим. Онтон лоп курдук 12 чааска генерал Горлицыҥҥа киириэхпит.
* * *
Сарсыныгар чопчу этиллибит кэмҥэ Соттинцев «үрүҥ дьиэҕэ» барда. Дьон бэйэлэрин икки ардыларыгар партия обкомун саҥа дьиэтин ити курдук ааттыыллар. Онно, бука, бу Ленин болуоссатыгар турар дьиэ, чахчыта, үрүҥ өҥнөөҕү эрэ буолбакка, АХШ президенин ордуута Үрүҥ дьиэ диэн ааттанара кырата суох суолталаннаҕа буолуо. Быһата, Америка сабыдыала итиннэ кытта көстөр…
Тас аантан хаҥас ойоҕоско турар кыра хоско киирэн, саҥата суох докумуонун биэрбитигэр, тоһоҕону ыйыстыбыт курдук көнөччү туттан олорор саас ортолоох дьахтар, ачыкытын үрдүнэн сэмээр одуулуу-одуулуу, толоро олорор сурунаалын быыһыттан түргэнник була охсон, эрдэ суруллубут көҥүлү туттарда. Дьахтар интэриэһиргээбит хараҕынан сирдэттэххэ, күн ахсын итинник дьаһамматтар быһыылаах.
Соттинцев көҥүлүн харабылга турар милииссийэҕэ көрдөрөн баран, үөһээ этээскэ тахсан, урут сылдьыбыт буолан, этиллибит кабинекка чопчу тиийдэ. Балтыһахтыы тардыллыбыт күөх сукуна бүрүөһүннээх остуол таһыгар турар, кабинет хаһаайына ыйбыт олоппоһугар олорунан кэбистэ.
Партия обкомун промышленноска сэкирэтээрэ Горнаков бэрт тупсаҕайдык бааллыбыт хаалтыстаах, сэргэх сэбэрэлээх саха киһитин астыммыттыы көрө-көрө:
– Үлэҥ сүнньүнэн Миниистирдэр Сэбиэттэрин промышленноска салаатыгар уонна атын туһааннаах сиргэ бэйэлэрин сүбэлэрин биэрбит буолуохтаахтар, – диэтэ.
Соттинцев «атын туһааннаах сиргэ» диэн тоһоҕолонон этиллибититтэн чөрбөс гына түстэ.
Горнаков, ону бэлиэтии көрөн, быһаарда:
– Эн кандидатураҥ киэҥ өрүттээх сүбэлэһиини, тургутууну ааспыта. Онон мин, чопчу, обком аатыттан партия сорудаҕын тиэрдэбин, – Горнаков остуолга иннигэр сытар паапканы арыйда.
– Истэргэ бэлэммин, Николай Дмитриевич.
– Быһаччы кэпсэтиэх, – Горнаков чаһытын көрүнэн ылла, ханна барыахтаах дуу, кими эрэ күүтэр дуу быһыылаах. – Бастакытынан, эйигин саҥа ананыыгынан эҕэрдэлиибин. Севернэйдээҕи хайа комбинатыгар генеральнай дириэктэр солбуйааччытынан барар буолбуккунан. Мин төлөпүөнүнэн генеральнай дириэктэр Бульдокову кытта хайыы-үйэ кэпсэппитим. Кини көрсөргө, үлэни билиһиннэрэргэ толору бэлэм олорор.
– Махтанабын!
Горнаков суруктаах, бэчээттээх лиис кумааҕыны көрдөрө-көрдөрө, Соттинцевка биэрэр.
– Маны, бюро уурааҕын, Бульдоковка илдьэн биэрэҕин. Сүрүн үлэҥ таһынан коллектив партийнай тэрилтэтин сэкирэтээринэн ананыаҥ. Ити – иккиһинэн. Ону эрдэттэн биһиги Бульдоковка эмиэ сэрэтиэхпит.
– Арай сөбүлэспэтин?
– Инньэ гынар бырааба суох, үрдүкү партийнай уурааҕы толоруохтаах. Субординацияттан ханна барыай? – Горнаков, кыраҕа да ымыттыа суох бэйэтэ, мүчүк гынан ылла.
– Миигин хонтуруоллата ыыппыттар диэн, иһигэр кымырдаҕас хаамыа суоҕа дуо?
– Дьэ, ол иһин сэрэтээри олоробун. Кинини кытта ханнык да күрсүүгэ киириэ суохтааххын. Сирэй утарсыма. Ол кэриэтин туохха эмит сөбүлэспэт түгэҥҥэр миэхэ биллэрэ тураар. Көмөлөһүөхпүт.
– Көмө хаһан баҕарар наада, – Соттинцев кэҕис гынаат, ыас хара өрүкүйбүт баттаҕын тарбаҕынан өрө анньан ылла.
Горнаков эмиэ чаһытын көрүнэр:
– Үсүһүнэн, коллективы сутурук курдук биир сомоҕо оҥорон, үлэни-хамнаһы өрө көтөҕөргө ылсаҕын, сүрүн күүскүн ол диэки туһаайыахтааххын. Ыйытардааххын дуо?
– Барытын өйдөөтүм. Партия сорудаҕыттан хаһан да аккаастана иликпин.
Горнаков, эмиэ чаһытын көрүнэ-көрүнэ, кириэһилэтиттэн туран кэллэ. Пиджагын тимэхтэннэ, хаалтыһын көннөрүннэ.
– Бюро буолара чугаһаабыт. Чэ, саҥа ананыыгынан өссө төгүл эҕэрдэлиибин уонна ситиһиини баҕарабын! – диэтэ.
Онтон, эмиэ оннуттан турбут Соттинцевка тиийэн, эрчимнээхтик илии тутуһан илигирэттэ.
* * *
Аллаах Үүнтэн кэлэн, Совнархозка үлэҕэ киирэн, икки оҕолоох ыал быһыытынан үс хостоох мас дьиэ ылан, дьэ, түптээн-таптаан олоруохпут диэн санаалаахтара. Хата, Нюрбината итини барытын буолуохтааҕын курдук ылынан иһэр. Хомнообот. Хомойбутун-хоргуппутун биллэрбэт. Үтүөкэн киһи! Дьиҥэр, кини ырыа-тойук, үҥкүү-битии куттаах, уйан-намчы уйулҕалаах киһи буоллаҕа. Бастаан, театртан барыах курдук буолбутугар, олус ытыктыыр киһитэ Суорун Омоллоон: «Нюрбина, театргын быраҕыма, эн хайаан да ыллыахтааххын», – диэбит этэ.
Свердловскай консерваториятыгар үөрэнэр эдэркээн, кэрэ бэйэлээх кыыһы кытта, оччотооҕуга, хайа инженерин идэтигэр үөрэнэ сылдьар Михаил, түөрт сыл устата эрийсибитэ, билсибитэ. Онтон бигэ санаатын киллэрэн: «Нюрбина, эн биһикки холбостохпутуна табыллар, мин эйигин хаһан да быраҕыам суоҕа», – диэн тылын ылыннаран, уруу тойун тэрийэн, устудьуон дьүөгэлэрин-доҕотторун үөрдүбүттэрэ.
Ол кэмҥэ, чахчы, Нюрбина артыыс быһыытынан кэскилэ арыллар сиригэр олоруохпут-үлэлиэхпит диэн саныыра. Онтулара баара ханна баар – Михаилы, үөрэҕин бүтэрээтин кытары, Өймөкөөҥҥө промышленность салаатыгар үлэҕэ ыыппыттара. Партия чилиэнэ, орган үлэһитэ дьаһалы ылыннаҕына уонна толордоҕуна эрэ сатанар. Атыннык буолар кыаҕа суох. Ону, хата, Нюрбината бэркэ өйдүүр.
Бу да сырыыга: «Миигин Севернэйгэ ыытар буоллулар, онон онно көһөбүт. Эн театргыттан эмиэ арахсаргар тиийэҕин, онно даҕаны культураҕа үлэлиэҥ буоллаҕа дии, музыка да өттүнэн барыаххын сөп», – диэбитин бэрт холкутук ылынан, хомунуу-көһүү уонна антах тиийэн олохсуйуу туһунан быһаарсан-токкоолоһон барбыта. Ити өттүнэн Михаил бэйэтин сэмэлэнэ саныыр, арай Нюрбина ити барыта киниттэн, Михаилтан, тутулуга суоҕун үчүгэйдик өйдүүрэ эрэ уоскутар.
Абаҕата Степан Сергеевич аан бастаан билсэн баран, таһырдьа тэлгэһэҕэ тахсан туран, туохтан эрэ улаханнык астыннаҕына биллэрэринии, будьурхай баттаҕын тарбахтарынан эрчимнээхтик өрө анньа-анньа, эйэҕэстик эриличчи көрө-көрө: «Дьэ, быраатым, үчүгэй кыыһы таба харбаан ылбыккын!» – диэбитэ уонна санныга охсон лап гыннарбыта. Дуобаттыы, саахыматтыы олорон күүстээх хаамыыны оҥордоҕуна эбэтэр, бултуу сылдьан, куһу-хааһы үчүгэйдик ытан түһэрдэҕинэ оннук гынааччы.
Михаил ийэтэ, оҕолоноругар хаана тоҕо түһэн, эрдэ суорума суолламмыта. Инньэ гынан, кинини эбээлээх эһээтэ ииппиттэрэ. Сэттис кылаас кэннэ Суоттуттан куоракка киирэн, абаҕатын аахха олорон, 2-с оскуоланы бүтэрбитэ. Онон киниэхэ махтала муҥура суох, иккис аҕатын тэҥэ саныыр. Абаҕата Борогонов – биллэр суруналыыс, суруйааччы. Салайар-тэрийэр үлэҕэ даҕаны эмиэ улаханнык миккиллибит киһи. Нюрбина оҕо сааһа ааспыт күөх Ньурбатыгар күөгэйэр күннэригэр үлэлии-хамсыы сылдьыбыт. Баҕардар, ол иһин даҕаны Нюрбинаны ордук сылаастык, истиҥник ылыммыта эбитэ буолуо.
Куоракка үөрэнэ киирдэҕин утаатыгар охсуһан, куһаҕан дьаллыкка ыллара сыспыттааҕа. Бэйэлэрин икки ардыларыгар да атааннаһыы баара, өрүс училищетын курсаннарын да кытта сотуһан ылаллара. Онтулара, өстөһүүгэ кубулуйан, дириҥээтэр дириҥээн иһиэх курдуга. Абаҕата кэмигэр орооһон, сөптөөх хайысха, сүбэ-ама биэрбэтэҕэ буоллар, Михаил олоҕун суола хайа диэки иэҕиллиэн ким-туох билиэ баарай?
Бииргэ үөрэнэр аймах уола Сёмалыын тарбахха кэтиллэр сибиниэс кастет уулларан оҥосто сылдьалларын балтылара, абаҕатын кыыһа, Саргылаана көрөн аҕатыгар эппит этэ. Степан Сергеевич элбэх моргуора суох уолаттар кастеттарын туура тутан ылбыта, иккиэннэрин бэйэтин иннигэр остуолга олордубута уонна: «Эһиги бу манан бэйэ-бэйэҕитин өлөрсөөрү гынаҕыт дуо? Эбэтэр атын кими эчэтээри гынаҕыт дуу? Ол сууттанар-хаайыыланар дьыала эбээт. Өскө күүскүтүн-уоххутун ханна да гынар дьарыккыт суох буоллаҕына, маста хайытыҥ, мууста аҕалыҥ. Аты мин булуоҕум», – диэн эппитэ. Уонна, ити курдук, чопчу сорудахтары биэрэн үлэлэтэр буолбута. Ону-маны уһаннарара – ол бэйэ илиитинэн тутан-хабан оҥоруу ураты кэрэхсэбиллээҕэ, син тугу эмэ бочоолоон, самаан-имээн, кыһан-кыччыйан таһаарар этилэрэ. Аны, иккис оскуола уонна өрүс училищетын дириэктэрдэригэр тиийэ сылдьыталаабыт этэ. Үөрэнээччилэри уонна төрөппүттэри кытары холбоһон кэпсэппиттэрэ, мунньахтары тэрийбиттэрэ, үөрэх кэнниттэн ыытыллар эбии дьарыктар үлэлэрин күүһүрдэн биэрбиттэрэ. Михаил ити кэмтэн спордунан үлүһүйэн барбыта.
Абаҕалара кэлин даҕаны оскуолаҕа ыччаттар ортолоругар быһыы-майгы хайдаҕын ыйыталаһа-билсэ сылдьааччы. Аһаҕастык, көнөтүнэн кэпсэтэри сөбүлүүрэ. Оскуола дириэктэрэ кылаастар ааннарын иннигэр туран, ыччаттар тугу кэпсэтэллэрин иһиллиир-чуҥнуур идэлээҕин, ону уолаттар ыраахтан көрөн: «Ааҥҥа Арамаан тура-ар!» – диэн үөгүлээн баран куотан хаалалларын уонна уолаттар икки ардыларыгар буолуталыыр бытархай бочооттоһуулар тустарынан кэпсиирин күлэ-күлэ истээччи уонна, олус бааспакка, бэрт эйэҕэстик туһалаах сүбэлэри биэрээччи.
Михаил абаҕатыгар сылдьан, эмиэ саҥа сиргэ ананан барар буолбутун кэпсиир санаалаах проспект устун баран истэ. Сотору-сотору массыыналар бирилэһэн ааһаллар. Массыына элбээн иһэрэ харахха быраҕыллар эбит. Абаҕата дьиэтин туттарын саҕана проспект Октябрьскай диэн ааттанара. Массыына ол сахха сэдэх этэ. Суол-иис даҕаны мөлтөҕө. Билигин, онно холоотооххо, быдан тупсан иһэр.
Өр гыммата, үс мас дьиэ турар кэҥэс тэлгэһэтигэр тиийэн кэллэ. Борогоновтаах дьиэлэрэ тэлгэһэ ортотугар турар. Тэлгэһэ аанын аттыгар турар дьиэ ойоҕоһуттан ханнык эрэ ыт, сүрэҕэлдьээбиттии, «моҥ…» диирэ иһилиннэ. Иччилэригэр «харабыллыыбын, баарбын, барытын билэ-көрө сытабын…» диэн биллэрээри муҥнанан эрдэҕэ буолуо.
Абаҕата дьиэтигэр соҕотох эбит. Кинигэ-кумааҕы өрөһөлөммүт остуолуттан туран, мэлдьи буоларыныы, эрилкэй харахтара үөрүү уотунан чаҕылыһан:
– Хайа, кэпсээниҥ бөҕө? – диэбитинэн көрүстэ.
Остуол тардан элэгэлдьитэ оҕуста. Курбалдьыйан, билигин даҕаны лаппа сэнэх. Төрүкү тыҥа ыарыһах киһи диэтэххэ, кытаанахтык тулуктаһан сылдьар. Ыалларга аҕыйах сыллаахтан бэттэх тэнийэн, киэҥ биһирэбили ылбыт холодильниктан биэс сулустаах ханньаагы таһааран, кыра үрүүмкэлэргэ кутта. Бэйэтэ биир үрүүмкэттэн ордугу хаһан да испэт идэлээх. Биирдэ хаһыатчыт доҕотторо кэлэн маанылата сырыттахтарына, ачыкылаах, ньалҕаархай баттаҕын хаҥас диэки ньылаччы тарааммыт, төтүгүрэс саҥалаах молойбут киһи: «Ыстапаан, эн бу туруорар биир иһит күндү арыгыҥ харчытыгар үс «Москуобускайы» ылбытыҥ буоллар, быдан үчүгэй буолуох этэ. Эбэтэр Испиир Уйбаанабыһы», – диэн баран, дьэ, хайдах курдук эттим диэбиттии, дьоннорун диэки олоп-чолоп көрүтэлээн кэбиспитэ. Онуоха абаҕата бэрт холкутук: «Оннук гыныахпын сөп этэ. Ол эрээри, дьон арыгылааһын курдук ыарахан кэмэлдьигэ ылларыахтарын, убаныахтарын баҕарбаппын», – диэбитэ Михаил мэйиитигэр хаһан да умнуллубаттык суруллан хаалбыт. «Лучше меньше, да лучше» диэн абаҕата сөбүлээн туттар этиитэ кини олоҕун биир сүрүн эркээйитинэн буолбута. Улуу Ленин суруйууларыгар ити курдук ааттаах, үлэҕэ-хамнаска, олоххо-дьаһахха каадыр уһулуччулаах суолтатын туһунан ыстатыйа баарын кэлин институкка үөрэнэ сылдьан билбитэ.
Михаил кэпсээнин истэн баран, абаҕата эппитэ:
– Чэ, бэрт. Миниистирдэр Сэбиэттэриттэн Степанов эйигин эркин курдук эрэнэрэ олус үчүгэй. Кэскиллээх, инникилээх салайааччы диэн көрөбүн, саныыбын. Аны, обком тойоно чопчу тугу сүбэлээбитин сөбүлүү иһиттим. Убай буоларбынан, олоххо билбиппэр олоҕуран, итиннэ кыра эбэрдээхпин. Бииргэ үлэлээччилэргин бэйэ дьоно уонна таһырахтар диэҥҥэ араартаама. Сүрүн айдаан хаһан баҕарар хайдыһыыттан тахсар. Мин, эдэрбэр улахан оройуоннарга үлэлээбит буолан, итини эппинэн-хааммынан билбитим. Ийэ-аҕа диэн уустаһыы уонна дьадаҥы-баай диэн хайдыһыы холбоһуктааһын саҕана, өрт уотунуу өрө күүрэн, миигин тирии курдук талкылаабыта. Онно хайаларын да диэки буолбакка, кырдьыгы кылаан оҥостубутум, тэҥник сыһыаннаспытым. Ол үрдүнэн урукку өттүгэр олус өрө тутуллубуттар, тэҥник сыһыаннаһыыны сөбүлээбэккэ, миигин обкомҥа уонна Киин кэмитиэккэ тиийэ үҥсүбүттэрэ.
– Ээ, ол саҕана буолумуна. Репрессияттан куттанан, былааска бэриниилээхтэрин көрдөрөөрү, киитэрэй киһийдэхтэр хобулаан дьаабыланнахтара дии. Билигин атын быһыы-майгы буоллаҕа… – Михаил, соччо-бачча хоҥоруутугар хоннорботтуу саҥаран эрдэҕинэ, Борогонов быһа түстэ.
– Кэбис, доҕоор, наһаа судургутук быһаарыма. Эн ити эдэргэр, дохсуҥҥар оҕустаран этэҕин. Хрущев «ириэриитин» тыына даҕаны сайа охсон эрдэҕэ. Эн биири кытаанахтык өйгөр хатаан кэбис: билиҥҥи киитэрэйдэр өссө эриллэҕэс ньымалардаахтар, уодаһыннаах киириилэрдээхтэр. Холобура, дуоһунаска үүнүөхтэрин баҕалаах карьеристар уонна конъюнктурщиктар саамай үрдүкү тойоттору кытта чугасыһарга бииртэн биир сонун албастары тутталлар. Бииргэ бултууллар-алтыыллар, ол-бу сылтаҕынан дьиэлэригэр ыалдьыттыыллар, бэл, преферанстаан аралдьыталлар.
– Ити, сорох кырдьаҕастар этэллэринэн, үйэ төһө да уларыйдар, былаас төһө да саҥатыйдар, дьон быһыыта-майгыта улаханнык уларыйбат үһү дии. Ону эн туох дии саныыгын?
– Ол – кырдьык. Сыл түөрт кэмнээх да, эмиэ хатылана турар. Итиитэ-тымныыта, ардаҕа-хаара, угута-кураана, үүнүүтэ-кэхтиитэ эрэ бэрт кыратык уларыйар. Былаас, политика да сол курдук ээ. Арай ити техника сайдыыта саҥаттан саҥа көрүҥнэринэн солбуллар. Ону батыһа, дьонуҥ да уустугуран истэхтэрэ дии. Ол эрээри, дьон баайгадуолга баҕата намыраабат, иҥсэтин-оботун маҥалайа аччаабат эбит. «Аска чугаһаатахха – иҥсэ көбөр» диэн саамай сөпкө эппиттэр. «Аппетит приходит во время еды». Ити алмааһы-көмүһү уоруу эмиэ онно маарынныыр ээ. Тутуллубакка, сатаан уордахтарын ахсын эбии имэҥирэн иһэллэр… Үрдэ суох хаһааҕа киирбиттии сананан…
– Абаҕам, саамай сөпкө быһаараҕын, мин көмүс бириискэлэригэр үлэлиир кэммэр итини илэ харахпынан көрдүм.
– Эн биир суолтан уһулуччу сэрэниэхтээххин. Түөкүттэр сирэйгэр олус бэртик сыһыаннаһыахтара, оттон кэтэххэр куһаҕаны оҥоруохтара. Быһата, кэтэххиттэн кэрбииргэ тууһугураллара эрэбил. Баллайар баһаам баайга-барыска баҕалаахтар киһи тыыныгар турары даҕаны кэрэйбэттэр. Ити – биирэ. Иккиһэ, бэйэлэрин хара санааларын ситиһэргэ араас сидьиҥ ньыманы туттартан туттунуохтара суоҕа. Үрдэ-анна суох холуннарыахтара, ол-бу оҕуруктаах үҥсүүлэри оҥоруохтара, дьону утары кигэн иэдээннээх иирээни тэрийиэхтэрэ. Бэйэм олорбут олохпуттан холобурдаатахпына, миигин «омугумсуйуук», «норуот өстөөҕө» диэн сордообуттарын-муҥнаабыттарын эйиэхэ урут кэпсээн турабын. Улахан политиканан буруйдаан, утарсааччыларын суорума суоллаабыттар элбэхтэр. Атын кыыбаҕанан кыайбатахтар сүрүн куоһурдара политиканан эргинии буоларын эн да билэҕин. Онуоха, билэр эрэ кыра, көмүскэнии, кырдьыгы булунуу – ол ыарахан.
Соттинцев үөһэ тыынан кэбистэ.
– Итини мин эмиэ амсайбытым. Өймөкөөн бириискэтин уоруйахтара арыллан эрэллэрин сэрэйээт, «омугумсук» Соттинцев атын омуктар көмүсчүттэрин сонордоон, үүртэлээн эрэр диэн, обкому «нөҥүөлээн», Киин кэмитиэккэ тиийэ үҥсүбүттэрэ. Ону уодьуганнааҥ диэн үрдүк сууттартан көрдөспүттэрэ. Бириискэҕэ анал хамыыһыйа кэлэн үлэлээн тугу да булбакка барбыта. Онон эрэ партийнай миэрэни ылбатаҕым.
– Политиканан ханна баҕарар, хаһан баҕарар эргинэллэр. Севернэйиҥ урдустарыттан да сэрэнээр, сэргэх сылдьаар.
– Сураҕа, кырдьык, алдьархайдаах халбархай, сүүлүк, салыҥнаах балык курдук дьон баар үһү. Сэрэнэн көрүөм да, дьэ, хайаһабын… Бөрөлөр, сылгыны үөмэн киирэн эрэ буолбакка, өр кэм устата илэ эккирэтэн охтороллоро эмиэ баар буолбат дуо…
– Сөпкө этэҕин: кинилэр – сур бөрөлөр. Ол эрээри, анаатылар да, хайыаххыный? Төннөр суол суох, инниҥ хоту дьулуруйан ис. Чэ, чэйдиэххэ. Аны хаһан көрсөрбүт биллибэт. Биһиги, аймахтарыҥ, эн бу дьиэҕэ олорон үөрэммиккин мэлдьи ахтабыт. Этэҥҥэ сырыттаххына, удьуор туйахпытын хатарааччы дьонтон биирдэстэрэ эн буолуоҥ.
2
Кустук өҥүнэн арылыйа оонньуур дьикти алыптаах алмаас таас көстөн, Севернэй бэрт түргэнник уонна аныгылыы тутуллубут куорат. Киэҥ-куоҥ уулуссалардаах, улахан таас дьиэлэрдээх, дэлэй көҕөрдүүлээх. Онно чыычаахтар сайыҥҥы чэмэлкэй күнү уруйдаан чыбыгыраһа туойаллар. Үчүгэйэ дьикти.
Арай хоту уонна таас сир буолан, ото-маһа иинэҕэс соҕус. Ол да буоллар, айылҕа барахсан чээл күөҕэ хараҕы, сүрэҕи-быары сылаанньытара, санааны-оноону сайҕыыра, куту-сүрү иитэрэ туохха тэҥнэһиэй!
Ол да иһин Соттинцев хайа сатанарынан сарсыарда аайы тыа саҕатыгар сүүрэн дэгэйэн кэлэн, эрчиллэр үгэстээх. Бүгүн даҕаны өрөбүл диэбэтэ. Эдэр уолаттар кэнниттэн ымсыырбыттыы көрөн хаалар, көхсүгэр «СССР» диэн суруктаах маастаркатын кэтэн, чэпчэкитик дыгыйан кэлэн, тыа саҕатыгар мускулла сылдьар. Кинини кытта, кэнники кэмҥэ, иккис фабрикаҕа алмааһы сууйуу инженеринэн үлэлиир Оготоев хам-түм бииргэлэһэр идэлэннэ. Устудьуоннуу сылдьан самбонан дьарыктанан бастакы разряды толорбут, кыра уҥуохтаах эрээри, иҥиир-ситии көрүҥнээх уола хаан.
Эрчиллээччилэр тыыллаҥнаһа-даллаҥнаһа, чохчоохойдуу-ыстаҥалыы түһэн бараннар, ыскамыайкаҕа олордулар.
– Алексей, туох баар сураҕы-садьыгы эн бэйэҥ бэркэ диэн истэ-билэ сылдьаҕын.
– Кулгааҕым таллаҕар да буоллар, куба, билиҥҥитэ, таба саахтыы илик, – Оготоев күлэн кылахачыйар.
– Оонньуута суох, үлэбитигэр улаханнык сэрэннэхпитинэ сатаныыһы, – Соттинцев иһигэр сэмэлии санаата. – Аны дьиэбитигэр кистэлэҥи кэпсэтиэ суохпут. Чистяков кистээн истииттэн сэрэниҥ диэтэ. Оттон төлөпүөнүнэн сатамматын бэйэҥ бэркэ билэҕин. Уоруйахтар араас тэрилинэн хааччыммыттара чахчы. Кэпсэтиини истэр «хомурдуостары» дьиэбитигэр эбэтэр үлэлиир сирбитигэр төһөнү баҕарар кыбытыахтарын сөп.
– Дьукку кистэлэҥ сулууспаҕа эрэ баар тэриллэри кинилэр хантан булуохтарын сөбүй? – Оготоев улаханнык мунаарбыттыы, эмиэ да саарбахтаабыттыы ыйытта.
Соттинцев «итэҕэйбэт да быһыылаах, сотору кэминэн, хайдах эмэ гынан, анал кууруска үөрэтэ ыыппыт киһи?» дии санаата. Оготоевы сыныйан кэтээн баран, сыыйа кистэлэҥ үлэҕэ сыһыарбыта үһүс сыла буолла, ол тухары оннук түгэн, дьэ, көстүмээри гынна – абаккалаах!
Төһө даҕаны иһигэр кыһыйан ыллар, Соттинцев салгыы бэрт холкутук эттэ:
– Буруйу оҥорор бөлөх силиһэ-мутуга олус дириҥ уонна киэҥ сири тайаан сытар быһыылаах. Киин ИДьМ биир улахан үлэһитин ойоҕо бриллиант биһилэхтэринэн, илибирэстээх-салбырҕастаах көмүс оҥоһуктарынан киһиргэнэрин туһунан үнүр миэхэ «киин хонтуора» киһитэ кэпсээбитэ. Эн кинини билэҕин. Эһиги фабрикаҕытыгар үлэлиир үрдүк бэлэмнээх силиэсэр. Дружинин диэн.
– Бай! Дружинин эмиэ чыкаа эбит дуу?! Миэхэ дьукку тугу да биллэрбэт дии! – Оготоев соһуйбут омунугар олорор сиригэр, үөһэттэн күүскэ охсуллубут эрэһиинэ мээчик курдук, өрө тэйиэккэлээтэ. – Мин букатын даҕаны билбэппин!
– Миигин да кытта саҥардыы эрэ билистэ. Оттон манна үлэлээбитэ ыраатта. Өссө мин иннибиттэн буолуоҕа. Дьокуускайдааҕы «хонтуораттан» ананан кэлбиппин билэн сылдьар эбит. Чэ, быһата, эн биһикки аны кини салалтатынан үлэлиэхтээхпит. Эн киниэхэ урукку сыһыаҥҥын уларытыма, саллыбыт-толлубут курдук туттума, – Соттинцев, күлэн, туус маҥан тэбис-тэҥ тиистэрэ кэчигирэстилэр. – Эн киниэхэ «тойоҥҥун», кини эйиэхэ бас бэринэр «үлэһит».
– Өйдөөтүм.
– Маннааҕы уоруйахтар Сойуус атын республикаларын, холобур, Армения алмааһынан эргинээччилэрин кытта ыкса ситимнээх курдуктар. Ону арыйарга Андропов дьоно туһааннаах сирдэргэ үлэлии сылдьаллар үһү. Онон, доҕоор, үлэбит олус уустугурда.
– Биһиэхэ, кыра саха дьонугар, дьукку ыарахан сүгэһэр буолууһу, – Оготоев өрө тыынна. – Дьиҥэр, «улахаттар», биһиги да көмөтө суох, дьарыктаныахтарын сөп эбит. Онто да суох дьарыктаналлар эбит буолбат дуо?..
– Чэ-чэ… Эрдий-эрдий… – диэт, Соттинцев санныга таптайан кэбистэ. Уола Дружининтан «өһүргэммит» быһыылаах, итэҕэйбэттэр эбит диэн, ити өттүгэр кыра да энчини тулуйбат тэһии майгылаах. – Уоруйахтар «кыра» сахаларга, сэнээн, киирэн биэриэхтэрин эмиэ сөп. Самбонан сэбилэммит хапсаҕайдьыт ааттааҕа сылдьарын билбэккэлэр. Алексей, оннук түгэҥҥэ түбэһиннэрэн, балай эмэ күүһүмсүйээччи омунун уҕарыппыт буолуохтааххын? – Соттинцев тоҥолоҕунан киһитин ойоҕоһун чэпчэкитик тып гыннарда. – Оонньуута суох, Чистяков «буруйу оҥорор бөлөххө саха киһитин булан кыттыһыннарыҥ» диэн сүбэлээтэ. Эн үлэһиттэргиттэн эрэллээх киһитэ була-көрө сырыт эрэ.
– Сөп, – Оготоев кэм сойбут, бэттэх кэлбит курдук буолла.
Соттинцев, сэмээр даллах гынан, куорат диэки ыйан ылла.
– Оол ким эрэ иһэр. Чэ, салгыы эрчиллиэх, – диэтэ уонна ойон туран тыыллаҥнаан-уунаҥнаан барда.
– Ситэритин били кими эрэ кэпсээбиккэр дылы, «Даллас! Дырас! Хантас! Налыс! Ахчас! Ньаадьас!» диэ, – Оготоев атаҕар тура биэрэн, күлэ-күлэ, кыттыста.
– Ээ, ол Миниистирдэр Сэбиэттэрин бэрэссэдээтэлин солбуйааччы Николай Платонович Степанов араадьыйаҕа гимнастиканы сахалыы биэрэр буолбуттар диэн дьээбэлээн, идеология сэкирэтээригэр төлөпүөннээн, онто итэҕэйэн, обком дьонун кыыл ыыта сыспыт үһү. Кэдэс! Мөтөс! Бөкчөс! Бакыс! – Соттинцев эрчимнээхтик утуу-субуу эрчиллии хамсааһыннарын оҥорор. – Үчүгэй буолбат дуо?
– Туох да ааттаах эбит! Накыс-икис!
Ити курдук омун-төлөн буолан эрчиллэ сырыттахтарына, «пуус-пуус!» диэн буугуначчы тыыммытынан, силлиһэ үүммүт хойуу сабыстыгас хаастарын аннынан, оҕус курдук, харахтара күлтэйбитинэн Мациев, маҥан маайкатын уолугунан түөһүн түүтэ харааран, нанайа бэдьэйэн кэллэ.
– Оо, коллегаларым барахсаттар! – эмискэ тэтимин эбэн ылаат, иннилэригэр хорус гынна, омуннаахтык илии тутуһан илигирэттэ. – Хайыы-үйэ бүтэн, баран эрэҕит дуу? Миигин кытта көххө, кылгастык өссө хамсана-имсэнэ түспэккит дуо, табаарыстар?
– Сылайдыбыт ээ, Матвей Арамович.
– Чэ, соҕотоҕун да дайбаҥнаан көрүөм. Бүгүн эрчиллиигэ хойутаатым. Аны, дьиэбэр дьонум аһаан бүппүттэрин кэннэ тобоххо тиийэрим буолуо? – көмүс тииһин килбэтэн, күлбүтэ буолан ыттайда. – «Эрдэлээбит чыычаах тумсун соттор, хойутаабыт – хараҕын хастар» диэн олус бэргэнник да эппиттэр эбит.
– Хайа-а, доҕоор! Матвей Арамович, уус тыл улуу маастара эбиккин дии! – Соттинцев хаадьылыах санаата киирэн, саҥа аллайда.
– Урут да, билигин да, киһи барыта суруйааччы буола сатыыр, – Мациев бу сырыыга баҕас, чахчы, эҕэлээхтик күлэн ылла. – Латинскай Америка президеннэрэ, үксүлэрэ, романистар дии. Биһиги Хрущёвпут даҕаны: «Бостууктуу сылдьан хоһоон суруйар этим», – диэбитэ буолбаат. Мао Цзэ-дун эмиэ хоһоон кинигэлээх. Үтүө үгэс көҕүтэр эбээт!
– Уот харахха этэҕин.
Хайалар!
Очуос таастар уһулута ойон тахсан
халлааны тыыраллар.
Халлаан сууллуоҕун
Халыҥ тирээбил буолан,
хата, өйөөн тураллар.
Күүстээхтик хоһуйан этии буолбат дуо? Мао Цзэ-дун хоһооно. Оттон Нерон ыраахтааҕы эмиэ дьиҥнээх поэт эбитэ үһү. Хаһан эрэ «Нерон – хаанымсах поэт» диэн кинигэни аахпыттаахпын.
– Мин кини туһунан атын кинигэни аахпытым. Онно Нерон бэргэн тылын холобурдаабыттар этэ. «Дьон диэн хой үөрэ, оттон мин маныыһыппын» диэбит этэ, – ити кэннэ Мациев, хайдах курдук эттим диэбиттии өҥнөн ылаат, өттүк баттанан баран, биилин имиллэҥнэттэ. – Өссө ол Нерон «харчы – сыта суох» диэбитэ эмиэ баар, тахсан киирэр сирдэргэ түһээн олохтоон баран. Үрдүк мораль сытыйыытын чаҕылхай көстүүтэ буолбаат?!
– Чэ, кытаат, эрчимнээхтик эрчилин. Эн мунньахтарга этэриҥ курдук, доруобуйа алмаастааҕар да күндү. Оттон «харчы сытын» туһунан Веспасиан император эппит буолуохтаах этэ, – Соттинцев, үгэргиирин кыратык да биллэрбэккэ, ыскамыайкаттан маастаркатын ылан саба быраҕынна.
– Оо, билигин дьиэҕэ тиийэн, сөп-сөрүүн уунан сайҕанан ылыллыа! – Оготоев Соттинцевы батыста. – Михаил Михайлович, аҕыйах сыллааҕыта «Кыымҥа» Мао Цзэ-дун хоһоонноро сахалыы тылбаастанан таҕыстылар диэн суруйбуттар этэ дии?
– Тахсан-тахсан. «Уон аҕыс хоһоон» диэн. Георгий Васильев тылбааһа…
Мациев, күө-дьаа кэпсэтэ-кэпсэтэ, ыраатан эрэр дьоҥҥо кэннилэриттэн, кистээн, хокуоска көрдөрө-көрдөрө сыыбырҕыы хаалла:
– Бу баар эһиэхэ, табаларга! Маолаахтар баҕастаахтар! Веспасиаҥҥын даҕаны эмэһэҥ үүтүгэр симин! Мациев «харчы сыта суоҕун» кинитэ да суох бэркэ билэр!
Онтон эмискэ үлүгэр сүр көрүдьүөстүк дайбаҥнаан барда. «Баччааҥҥа диэри эрчиллибэтэх киһи, кэнники кэмҥэ эмискэ күөрэйбиппин уорбалыы саныахтара, бээ, «табалар» харах далыттан сүтүөхтэригэр диэри таймаҥнаабыта буолуохха» дии санаата. Мэктиэтигэр, хантан эрэ көтөн кэлэн, тииккэ үөн көрдөөн, кэтэҕэ кэҕиҥнии-кэҕиҥнии, хатырыгы харса суох тоҥсуйбалаан табыгыратан испит тоҥсоҕой, «бай да, бу тугуй?!» диэн соһуйбуттуу көрүөлээтэ, онтон чиччигинии түстэ даҕаны, тоҥсуйан торулатта.
Мациев ол диэки хайыста уонна сиртэн хаппыт мутугу харбаан ылаат, тоҥсоҕойу быраҕан кыыратта. Астыммыттыы арсаҕар тииһин быыһынан «чыырк!» гыннарда, баран иһэр дьону өһүөннээхтик дьөлө көрдө.
Эрчиллибитэ буолан тараҥнааҥҥыт, төһө уһун үйэлэнэргитин көрүөхпүт, көр да маны, эһиги чыс кутуйахтарга холооннооххут, биһиги баабырдарга тэҥнээхпит!
Киэбирэ санаата, наначчы тутунна.
Халлааҥҥа кимнээх тирээбил буолалларын биллэриэхпит!..
* * *
Шагалов иккис этээскэ, кыахтаахтык даадаччы туттан, лиһиргэччи дабайан, хара дерматин бүрүөһүннээх аан иннигэр тохтоото уонна кнопканы баттаата. Нөҥүө өттүгэр тохтоло суох дыыгыныыр тыас иһилиннэ, онтон күлүүс халыгыраата.
– Хайа, хайа хотойо, туохха ыҥырдыҥ? – диэн Шагалов тас таҥаһын устан ыйаат, бүтүннүү дьэрэкээн оһуордаах көбүөрүнэн саба тэлгэммит саалаҕа киирэн, кириэһилэҕэ олорон иһэн ыйытта.
– Сүбэлэһээри, Моисей. Бүгүн сарсыарда, эн сорудаххынан, тыа саҕатыгар сүүрэ-эрчиллэ тиийбиппэр Соттинцевтаах Оготоев үгэ-хоһоон тылынан көрүстүлэр. Мин да хаалсыбатым.
– Хайдах?
– Нероҥҥа, Мао Цзэ-дуҥҥа, Хрущёвка эҥин тиийтэлээтибит.
– Оок-сиэ! Эн эмиэ дуо?
– Тулуйбатым. Хардары тыл быраҕыстым.
– Сыыспыккын. Сөбүлээбэтэххин тоҕо биллэрдиҥ? Уорбалыахтарын сөп. Уруккуҥ курдук, сирэйдэрин өрө салыаҥ этэ.
– Эс! – Мациев дьаалайбаттыы илиитин киэр хаһыйда. – Табалартан баҕас тоҕо куттаныамый?! – курустаал үрүүмкэҕэ толору куттубут ханньаагын биир тыынынан хантас гыннаран кэбистэ.
– Табалаһа сылдьаҥҥын, туундара буурун тэбиитигэр түбэһиэххин сөп, – Шагалов иннигэр турар намыһах сурунаал остуолугар сытар сакалааттан эмти тутан ылан, айаҕар быраҕынна.
– Көрүөхпүт!
– Тоҕо үгэргэһэллэрэ буолуой?
– Сүөһү эриэнэ таһыгар, киһи эриэнэ иһигэр. Тугу санаабыттарын кэлин эрэ билиэхпит… Партийнай мунньахха дуу, туохха дуу…
– Олус долгуйума, атаас! Ким кыайарын биэтэккэ тахсыы билиэҕэ. Үнүр, биһиги бөлөхпүт дьоно, бултуу сылдьан сүбэлэстибит. Кинилэри утары икки ньыманы туттарга быһаардыбыт. Биирэ, ити дьиккэрдэри үлэлэриттэн уһултарыы эбэтэр атын сиргэ көһөртөрүү. Онуоха үҥсүү ньыматын туттуохтаахпыт. Обкомҥа, үлэһиттэри утарыта туруортаан, «коллективы ыһан эрэллэр уонна омугумсуктар» диэн улахан суругу тэрийиэхтээхпит. Онно бытах-итэх үлэһиттэри, арыгылатан-хайаан, биһигини «өйөөччүлэри» булан, түмэн, илии баттатыахха. Били, хаартыһыт Храп Миколаны эҥин туһаныахха сөп. Таах, аҥаардастыы кэрэ хараҕын эрэ иһин, коммунистическай үлэ ударнига буолуо дуо! Үҥсүү тиийдэҕинэ, обком сэкирэтээрдэрэ, ордук промышленноһы салайар Горнаков, Бульдоковтан ыйыталлара чахчы. Ол иһин, сурук барыан иннинэ, Бульдокову бэйэбит диэки иҥнэтиэх, хаадьаҥнатыах тустаахпыт. Ол соругу мин бэйэм толоруом. Оттон эн илии баттыыр «туруу үлэһиттэри», «пятилетка бастыҥнарын» сүүмэрдиэҥ. Бульдоков Миряевтыын тапсыбаттарын биһиги бары билэбит. Бульдоков миэхэ биирдэ: «Киин кэмитиэккэ «омугуйумсуйууну, олохтооҕумсуйууну өйүүр» диэн үҥсүү тэрийиэххэ баара», – диэн этэн аһарбыттаах. Ол барыта, биллэн турар, чып кистэлэҥинэн буолуохтаах.
– Дьыала туһугар мин ити сорудаҕы муос-таас курдук ылынабын, – Мациев курустаал иһит хааламмыт стенкатын диэки дьиэгэниччи көрүөлээн ылаат, төбөтүн булкунан ылла.
– Джигит! Дьиҥнээх джигит! Алмааһы уорарбыт арылыннаҕына, бары хаайыыга түбэһэрбитин өйдөөтөхпүтүнэ сатанар, – Шагалов, хайҕаабыта буолла даҕаны, муустааҕынан көрбүт хараҕар биир кыым оҕото да кыламнаабата.
– Өссө дьикээрдэри уоскутарга атын суолу толкуйдаабатыгыт дуо? Үнүр Москубаттан кэлбит дьону бултаппытыҥ дуо? – Мациев бастакы ыйытыытыгар иккис ыйытыытын чабырҕахтыыр кэриэтэ «мэҥэһиннэрдэ».
Шагалов ымах гынна, «дьэ, уол да уол, тарбаххын уган биэрдэххинэ, тоҥолоххор диэри биирдэ лып гыннаран кэбиһииһи!» дии санаата.
– Элбэҕи билиэҥ – эрдэ кырдьыаҥ! Ытык кырдьаҕастар итинник этэллэр, джигит. Хантан кэлбиттэрэ суолтата суох. Кимнээх кэлбиттэрэ эмиэ. Өйдүүгүн дуо, суолтата суох. Бултуу кэлбиттэрэ – ол суолталаах. Эн – булчуккун. Мин – булчуппун. Кинилэр – булчуттар. Өйдүүгүн дуо?
– Өйдөөн-өйдөөн. Мациев өйдөөбөтө кэлиэ дуо, һы-һы-һыых…
– Оттон атын суолу толкуйдаан бөҕө буоллаҕа. Ноу проблем. Ууратары эбэтэр көһөрөрү ситиспэтэхпитинэ, бүтэһиктээх ньымабытын туттуохпут, – Шагалов сахсырҕаны саба охсордуу ытыһын лап гыннарда. – Суох оҥоруохпут. Бүттэҕэ ол.
– Бэрт! – Мациев эрбэҕин чочотто. – Оччоҕо мин үҥсүү сурук тэрээһинин бүгүҥҥүттэн саҕалыыбын.
– Чэ, кытаат! Барытын уу тэстибэтинии ыпсар!
– Дьыала хайдах баран иһэрин биллэрэ туруоҕум.
Куомуннаахтар, туран эрэ, үрүүмкэлэрин охсуһуннаран лыҥкынаттылар.
* * *
Аһаан баран, Соттинцев саалаҕа киирэн, дьыбааҥҥа кэтэх тардыстан, биир сири тонолуппакка одуулаан сытта. Ортолообут күн күлүмүрдэс уотун түннүгүнэн дэлэччи кутар да кутар. Араадьыйаҕа хойуу сөҥ саҥалаах киһи, тугу эрэ кэпсээн, тохтоло суох суккуйар.
Соттинцевтаах Севернэйгэ кэлбиттэрэ хайыы-үйэ уон икки сыл буола охсубут. Манна букатыннаахтык олохсуйдулар диэххэ сөп. Иллэрээ сыллаахха бу Ленинградскай проспекка турар дьиэҕэ түөрт хостоох квартираны ылбыттара. Онтулара, бэйэлэригэр сөрү-сөп курдуга эрээри, оҕолор бардахтарына, хайдах эрэ кураанахсыйан-кэҥээн хаалар курдук эбит…
Куукунаҕа иһит сууйа хаалбыт Нюрбина бүтэн, кэргэнин аттыгар кэлэн, өрүкүйбүт будьурхай баттаҕын имэрийдэ.
– Хайа, доҕоор, бу күннэргэ тоҕо үүтүн тохпут оҕо курдук мунчаардыҥ?
– Ээ, үлэбитигэр мөккүөр элбэх. Тойонум миэхэ тымныйан хаалбыт. Аһаҕастык кэпсэппэт, ууну омурдубут курдук туттара үксээтэ… Ол төрүөтүн таайа сатыыбын, – Соттинцев кэргэнин, илиититтэн тардан ылан, дьыбааҥҥа олорто.
– Эйигин сөбүлээбэт дьон хобу-сиби тиэрдэллэрэ дуу эбэтэр, үлэҕиттэн уһултараары, интриганы тэрийэллэрэ дуу. Үнүр миэхэ дьүөгэ дьахтарым: «Коллективка эн киһигин утары туох эрэ оҥоһуллар быһыылаах», – диэбитэ. «Туох?» – диэн ыйыппыппар: «Чуолкайын билбэтим ээ», – диэн хоруйдаабыта. Дьахталлар «тойомсук, улахамсык, ирдэбиллээх курдук тутта сатыыр, арааһа, дириэктэр Бульдоков миэстэтин былдьаһар быһыылаах» диэн эн тускунан сибигинэһэллэрэ күүһүрбүт үһү.
– Хоп-сип быыһыгар өрүүтүн кырдьык кыыма кыламнааччы. Тыала суохха мээнэҕэ мас хамсаабатаҕа сэрэйиллэр. Туох эрэ баар курдук.
– Сэрэнэн сырыт эрэ. Көрдүгэннии сытар улахан өрт уота буолаарай? – Нюрбина, умса түһэн, кэргэнин түөһүгэр сыһынна.
Ити кэмҥэ тас аан тырылыыра тыаһаата.
– Бай, киммит кэллэ? – Соттинцев өндөс гынна.
– Эн, баран, ырбаахыгын кэт, мин арыйыам, – Нюрбина аан хоско барда.
– Үтүө күнүнэн! – Шагалов ойоҕо Цветая чаҕаархай саҥата иһилиннэ. – Хайа, туох сонун баарый, Нюрбина-а?
– Улахан туох да суох ээ. Бүгүн култуура саҥа киинигэр мин бэлэмнээбит концерым буолуохтаах. Онно бэлэмнэнэн, адьас солото суох сылдьабын. Хата, оҕолор суох буоланнар, арыый кыанан эрэбин.
– Хастан буоларый?
– Киэһэ сэттэ чаастан. Хата, кэргэҥҥинээн кэлээриҥ. Бүгүн өрөөтөҕө дии.
– Ама дуу, дьүөгэм киэнигэр кэлиминэ. Кыыспынаан сылдьыахпыт. Кини ыллыырын олус-олус диэн сөбүлүүр ээ. Ол иһин аҕата биһикки «Соловейчааммыт» диэн ааттыыбыт. Кыыспытын олус-олус таптыыбыт. Күүскэ да күүскэ. Биһиги, ордук мин, оҕолорбутун ханна эрэ мээнэ ыытан кэбиһэн баран, тулуйан-тэһийэн сылдьар кыахпыт суох.
Нюрбина олус «мээнэ» да буолбатар диэн өһүргэнэ санаата эрээри, онтун биллэрбэтэ, кулгааҕын таһынан аһаран кэбистэ. Кинилэр уолаттара сайыҥҥы лааҕырга сылдьаллар. Оҕолор сынньалаҥнарын тэрийэр өттүгэр алмаасчыттарга тэҥнэһэр тэрилтэ баара өссө биллибэт, ол туһунан Цветая билбэтэ кэлиэ дуо, олус бэркэ билэр. Ол эрээри, ити, идэтинэн үчүгэмсийэн ылла.
– Бэрт дии. Ырыаны аргыс оҥоһуннаҕына мэлдьи дьон-сэргэ ортотугар өрө көтөҕүллүүлээхтик сылдьыа, олохтон төрүт чуҥкуйуо суоҕа.
– Да-а! Өйүкэҥ диэн туох да дьикти! Ырааҕы сүбэлиигин! Хата, эн иллэҥ кэмҥэр кинини репетициялыаҥ дуо? Баҕар, эн курдук, консерваторияҕа ыытар күммүт кэлиэҕэ. Эрэйгин ыраас харчынан төлүө этибит, – Цветая тохтоло суох чаҕаарыйарын быыһыгар ахсыыларын аайы кэриэтэ көмүс биһилэхтээх тарбахтарын сараҥнатан тырах-ирэх гынан ылла.
– Эс! Дьүөгэлэр икки ардыларыгар эмиэ тугун харчытай?! Көннөрү даҕаны эрчийиэм. Уонна «Кустук» диэн оҕолорго ырыа ансаамбылын тэрийбитим дии. Онно сылдьыа этэ.
– Оо, махтал, Нюрбинкам барахсан! Харчынан сатаммат буоллаҕына, тугунан эмэ син биир толуйуохпут, – саба түһэн кууспахалаан, уураамахтаан ылла, хостон Соттинцев тахсан дорооболоспутугар биирдэ уоскуйда. – Оо, Михаил Михайлович, дорообо-дорообо!
– Эһиги, кырасаабыссалар, кэпсэтэргит элбэх буолуо. Оттон мин массыынабын көрүнэ гаражка тахсыым. Баҕар, сарсын ханна эмэ салгын сии барыахпыт дии, – Соттинцев, Нюрбинатын диэки сып-сылаастык көрө-көрө, киэпкэтин ылан кэттэ.
Аан сабыллаатын кытта Цветая эмиэ тарбахтарынан оонньуу-оонньуу, омун-төлөн буолла:
– Оо дьэ! Михаил Михайлович барахсан дэгиттэр да киһи! Мин кэргэним кинини «универсал» диэн хайгыыр да хайгыыр!
– Дьэ, Моисей Иванович булан этэр! – Нюрбина да хаалсыан баҕарбата. – Хараҕа сытыыката бөҕө! Барытын таба көрөр. Бэл, киин сир кырасаабыссаларын быыһыгар эйигин таба көрөн кэргэн ыллаҕа эбээт!
– Хайаан таба көрүө суоҕай?! Мин диэн эдэрбэр «гарна дивчина» буоллаҕым дии. Оо, оччолорго мин кэннибиттэн төһөлөөх элбэх биллэр киинэ артыыстара, режиссёрдар тарбыйах курдук батыһа сылдьыбыттарын көрүөҥ этэ, Нюрбиночка! Ырыаһыттары эҥин этэ да барыллыбат! – Цветая биир кэм тырымныы түстэ.
Нюрбина күлэн лыҥкынатта:
– Бу да кыыс эмиэ булан этэр ээ. «Тарбыйах курдук» буолан…
– Кырдьык-кырдьык, Нюрбиночка.
– Дьүөгэбин хайдах итэҕэйиэм суоҕай? Харахпар букатын бу баардыы оҥорон көрөбүн, – Нюрбина сол да күлэн санна ыгдаҥалыы-ыгдаҥалыы, куукуна түннүгүн сэҥийэтигэр турар сибэккилэргэ уу кутта. – Һуу, түксүлүөххэ. Уубун иһинэн-таһынан кутаары гынным. Хата, тэллэй ардаҕа кутан ааста дии. Сарсын өрөбүлгэ, үчүгэй күн үүннэҕинэ, биһиги ойуурга бараары оҥостобут.
Цветая, букатын кыра оҕо курдук, ытыһын охсор, харахтара тырымнаһан туох да дьиктилэр. Бу орто дойдуга киниттэн ордук дьоллоох, үөрүнньэҥ, элэккэй киһи, ама, баара буолуо дуо диэххэ айылаах.
– Эчи, тугун үчүгэйэй! Мин кэргэмминээн барсыахпыт этэ. Оҕонньотторбут доҕордоһууларын эн биһи, эмээхситтэрэ, бөҕөргөтүөх тустаахпыт. Доҕордоһуу арыйбатах аана диэн суох!
– Оччоҕо сарсыардаттан төлөпүөннэһиэхпит.
Эмискэ баҕайы чуумпура уонна боччумура түһээт, Цветая, сибигинэйэн, тэп-тэтэркэй памаадалаах болтойбут уоһа чорбоҥолоото:
– Чахчытынан эт эрэ, кэргэҥҥин тэллэйдииргэ бэрт эрэйинэн сөбүлэһиннэрдиҥ дуо? Тоҕо олус мунчаарбыт, кыыһырбыт курдугуй?
– Бэҕэһээ киэһэ ыалдьыттар сылдьыбыттара. Ол чаана оҕуста ини?..
– Ол аайыттан итинник саппаҕырыа дуо? Үлэтигэр кыһалҕа үөскээбитэ буолаарай? Мин эрээшкэм дөрүн-дөрүн эмиэ итинник буолан хаалар ээ, үлэтигэр сатамматаҕына…
– Мин киһим ол туһунан тугу да кэпсээбэт дии. Сымара таас курдук.
– Кэпсэттэр ээ. Көймөстүбүт санаатын таһаарыаҥ этэ. Стресс диэн сэрэхтээх кыыл.
– Үтүө санааҕар, сүбэҕэр махтанабын!
– Оттон мин истэрбинэн араас тыл-өс тарҕанар эбит, – Цветая ыга анньан кэлэн, Нюрбина кулгааҕар букатын да киирэн хаалыах курдук буолла. – Коллективы хайытар диэн сурах иһиллэр. Кимнээх оннук сураҕы ыыталлара буолуой?
– Киһим үлэтин туһунан тугу да кэпсээбэт. Эн сонуҥҥун бу саҥа иһиттим. Эһиэхэ атын туох эмэ сибики биллибэт дуо? – Нюрбина эмиэ да аймаммыттыы, эмиэ да ааттаспыттыы көрдө.
– Бульдоковтуун тапсыбат буолан эрэллэр дииллэр…
– Уой даа! Төрүөтэ туохха дииллэрий?
– Бульдоков кириэһилэтигэр дураһыйар үһү дииллэр.
– Тугун сүрэй! Мин киһим урукку өттүгэр оннуга суох этэ… – аан тыаһаабытыгар Нюрбина сөмүйэтин уоһун туора тутта. – Эн эмиэ тэллэйдииргин олус сөбүлүүр эбиккин дии?
– Оо, туох да олус буоллаҕа дии! – Цветая өрө чаҕаара түстэ уонна Нюрбина диэки аҥаар хараҕынан чыпчыҥныы мичиҥнээтэ.
Соттинцев куукунаҕа өҥөс гынан:
– Хата, массыынабыт этэҥҥэ эбит, – диэтэ уонна суунар сиргэ киирдэ.
Оттон Цветая, чэйин да ситэ испэккэ, ойон турда:
– Тыый, мин тиэстэ туруоран киирбитим дии! – тахсаары, ааҥҥа барда. – Чэ, көрсүөххэ диэри! Киэһэ-сарсыарда төлөпүөннэһиэхпит. Ити, тэллэйдии барар туһунан этэбин.
– Хайа, «бастыҥ дьүөгэҥ» Сибэкки тугу сыыбырҕаан баран куймахыс гынна-а? – Соттинцев, күлэ-күлэ кэлэн, кэргэнин сүр сымнаҕастык кууһан кэбистэ. – Бензин сыттаах диэмэ. Бензини тыыппатым. Мыыланан сууннум. Илиим мыыла сыттаах.
Нюрбина күлэн лыҥкынаата, хараҕын симэн тура түстэ, эрин илиититтэн имэрийдэ, сымнаҕастык сыстан сыллаата, онтон үөһэ тыынан баран эттэ:
– Бульдоковтуун тапсыбаттар үһү диир. Төрүөтэ – тойон буола сатыыр үһүгүн.
– Сэрэйбит сэрэх. Бульдоковка утары туруорууну саҕалаабыттар.
– Оччоҕо хайыыгын?
– Эн биһи онно кыһамматах курдук туттуохтаахпыт, чыычаах. Салгыы туох буоларын кэтэһиэххэ. Уонна тугу кэпсиир?
– Сарсын тэллэйдии барабыт диэбиппэр: «Оо, олус бэрт, биһиги кэргэмминээн эмиэ барсыах этибит. Оҕонньотторбут доҕордоһууларын бөҕөргөтүөххэ», – диир.
– Сибэкки уонна уодаһын… Сэрэхтээх сибэкки буолбут… – Соттинцев хараҕа кырыыланан, тымныйан ылан, чочумча толкуйдаан турда. – Ол эрээри, чэ, барыстыннар даҕаны. Хайдах буолан иһэллэр эбит. Арай, чыычаах, эн, холкуос кыыһа Долгунча, хас биирдии тылгын кытаатан толкуйдаан баран саҥараар.
* * *
Атырдьах ыйынааҕы күн арҕаалаан киирэр өттүгэр баран эрэр.
Оҕолор тупсаҕай оҥоһуулаах оонньуур сирдэрин диэки, ойдом турар ыскамыайкаҕа, Шагалов кэргэнинээн салгын сии тахсан олороллор. Ардах кэннэ буолан, оҕо аймах суоҕун тэҥэ. Чуумпу. Кураан, сылаас киэһэлэргэ маннык буолбат. Биир кэм күйгүөрэн олорооччу.
Арай, дьиэ иннигэр турар остуолга эр дьон доминолаан лабырҕаталлар.
– Цветка, мин сэгэрим! Имигэс да өйдөөххүн көрдөрбүккүн. Кинилэри харыстаан сэрэтэр курдук кэпсээбитиҥ олус бэрт. Бульдоковка Соттинцевы дуоһунас былдьаһар диэн сураҕы бэйэтин саамай итэҕэйэр киһитинэн хайыы-үйэ тиэрдэн турабыт. Ону тоҕоостоох түгэҥҥэ, коллектив туругун ырыта олорон, киниэхэ бэйэм эмиэ бигэргэтэн турабын.
– Кырдьыктанар курдук туттубута дуо? Сирэйин-хараҕын сыныйан көрдүҥ ини, Мося? – Цветая Москуба аатырбыт «Берёзка» маҕаһыыныттан валютаҕа ылыллыбыт, саҥа кэтэн тахсыбыт муру-муодунай кып-кыһыл өҥнөөх платформа босоножкатын, астыммыттыы, эргим-ургум хамсатан көрө олорон, лоп бааччы ыйытар.
– Харахпын ханна да халбарыппакка кэтээтим. Дьүһүйэн эттэххэ, тимири ыйыстыбыт курдук дьүһүннэннэ. Быһата, итэҕэйдэ быһыылаах, – Шагалов ытыстарын суураланна.
– Мэлдьи бииргэ бултууруҥ, дьиэтигэр сылдьан преферанстыырыҥ туһалаан эрдэҕэ дии.
– Оннук. Өссө биир сонуну үнүр Дьокуускайтан командировкаҕа кэлбит обком промышленноска салаатын инструкторыттан иһиттим. Бастакы сэкирэтээр Миряев Бульдокову сөбүлээбэт буолан эрэр үһү. Холуочутаммын иһиттим, – диэн киһиргээбиттии туттар.
Цветая кэргэнин уураан ылар.
– Тоҕо буолуой?
– Ааспыт обком пленумугар Бульдоков ыарыйдым диэн барбатаҕа. Ону Миряев бэйэтин дьонунан кистээн бэрэбиэркэлэппит. Бульдоков сымыйа бюллетени ылбытын билбит.
– Хайа, оччоҕо Бульдокову кырдьык устан кэбиһээйэллэр?
– Оннук буолуо суоҕа. Биһиги утары дьаһалы хайыы-үйэ ыллыбыт. Соттинцевы омугумсук уонна бардам, тойомсук дэттэрдибит. Үлэһиттэри «бэйэ дьонугар» уонна «таһырахтарга» хайытар кыыбаҕалаах диэн үҥүһүннэрдибит. Онтубут обкомҥа дьайан эрэрин туһунан ол инструктор дуома рестораҥҥа сачайан олорон айахтатта.
– Үчүгэй дии. Булугас даҕаны өйдөөххүн! – Цветая иҥнэс гынан, эрин эмиэ иэдэһиттэн ууруур. – Кэлэр өттүгэр гаайкаларын өссө ыга тардыҥ. Инньэ диэччигит дии, Моська? – атаахтаабыт кыыс курдук төбөтүн туллаҥнатар, онтон сөмүйэтин чочоҥолотор. – Бытаарымаҥ.
– Оннук-оннук, – Шагалов кэргэнин илиититтэн харбаан ылан, сөмүйэтин лап гыннара ытырбыта буолар. – Ам-м! Эн, кэрэчээнэм барахсан, мамаҥҥын үтүктэн, миигин «моська» диэн сыыһа этэҕин. Аҕаҥ Лазарь Самуилович күҥҥэ эрэ көрбүт күндү Сибэккичээнин дьылҕатын, хахайга буолбатаҕына, баабырга итэҕэйэн туттарбыт буолуохтаах. Ыр-рр-рр! – диэт ыга кууһан ылар, Цветая, күлэн быычыгырыы-быычыгырыы, атаҕынан тэбиэлэнэр. – Оннооҕор, бу, куоска курдук ньылбааран сылдьан, ол-бу «туундара кутуйахтарын» хороонноруттан быгыалаабат оҥортоон эрэбит. Онтуларыгар салгыы «эмтээх уубутун» кутан, бытааһахтарын кытары бииргэ тумнаран кэбиһиэхтээхпит.
– Өйдөөбөтүм. «Эмтээх ууну» диэн тугу этэҕин? Арыгылатан дуо? Нюрбина арыгыны төрүт испэт ээ, оннооҕор ликёру.
– Эс! Интриганы, хобу-сиби, сураҕы күүскэ тарҕатары этэбин.
– Оо, оччотугар туйгун туттуу буолууһу дии, куоскаллайым! Эйиэхэ ситиһиини баҕарабын, – Цветая имигэстик эриллэ биэрэн, эрин иэдэһиттэн уураан чубурҕатар. – Киэптииллэрэ эрэ сүрдээх! Холобур, ити Соттинцев ойоҕо консерваторияны бүтэрбит буолан, атын баҕайытык туттан кынтаарыҥныыр дии!.. Арба, сарсын тэллэйдэһэ барсарбытын хайыыбыт?
– Хайаан да барсабыт!
3
Партия обкомун дьиэтин иһигэр, үгэс курдук, ханнык даҕаны ордук хос барыы-кэлии, киирии-тахсыы суох буолар. Этэргэ дылы, бу сырылас куйааска сөрүүн, тоһуттар тымныыга сылаас дьиэҕэ бүгүн даҕаны үлэ чуумпу кэмэ сатыылаабыт.
Хаҥас кынакка үһүс этээскэ баар Миряев кабинетыгар Горнаков уонна Соттинцев билбэт биир киһитэ – сэрэйдэххэ, инструктор быһыылаах – бааллар.
Соттинцев инструктор биэрбит кумааҕытыгар суруллубуту ааҕан бүтэн, төбөтүн өндөтөн, балтыһахтыы тардыллыбыт остуол баһыгар күүппүттүү көрөн олорор Миряев диэки хайыста.
– Михаил Михайлович, үҥсүүнү ити аахтыҥ. Туох диэн быһаарардааххын? Биһигини, биллэн турар, анонимнайа сэрэхэдитэр.
– Барыта холуннарыы! – Соттинцев үҥсүү суругу эргим-ургум тутар. – Үлэһиттэргэ тус бэйэм сыһыаным үчүгэй. Ким эрэ тэрийиитинэн суруйбуттар.
– Кимнээх буолуохтарай?
– Сирэйбэр бары үчүгэйдэр. Онон таайар уустук. Сыыһыахпын сөп.
– Оннук. Оччотугар суругу пууннарынан ырытыахха. «Коллективы үрэйэн эрэр…» диэн бигэргэтиигэ тугу этэрдээххин?
– Ханнык даҕаны чахчыны аҕалбатахтар, барытын саба быраҕан эппиттэр. Кими эмэ чопчу ааттаабыттара буоллар, ким тэрийбитин балай эмэ оруннаахтык сабаҕалыахха уонна, үөрэтэн көрөн, булан ылыахха сөп этэ.
Миряев инструктор диэки көрөр.
– Ити үҥсүүгэ ахтыллар үлэһиттэр эн бэрэбиэркэҕэр туох диэбиттэрэй?
– Бары мух-мах хоруйдаабыттара. Үтүктүспүт курдук: «Миэхэ быһаччы сыһыана куһаҕана суох эрээри, биллибэтинэн хайдыһыыны тэрийэрэ иһиллэр», – дэһэллэр. Ол хантан уонна кимтэн иһиллэрин эмиэ токкоолоспутум. Сойуолаһыыга, тылга-өскө, сиигэ-одууга түбэһиэхпит диэн дьаарханаллар, онон чопчу ааты этэртэн туттуналлар үһү, – итинник сорудахтары толоро үөрүйэх быһыылаах, инструктор быһаарыытын лоп бааччы биэрдэ.
– Михаил Михайлович, – Миряев мүчүк гынаат, ачыкытын көннөрүнэн ылла. – Оттон «үлэһиттэргэ омугунан көрөн сыһыаннаһар, холобура, сахалары олус өрө тутар, элбэхтик бириэмийэлиир эҥин» диэн этиигэ туох быһаарардааххын?
Соттинцев, улаханнык сонньуйдаҕына буоларыныы, ону туох диэхпиний, суох аата суох буоллаҕа диэбиттии, ытыһын нэлэс гыннаран кэбистэ.
– Алмаас үлэтигэр төрүт олохтоох дьон ахсаана адьас аҕыйах. Уон бырыһыаны даҕаны кыайбаппыт. Онон мин обком конференциятын уурааҕын олоххо киллэрэр соругу күүскэ туруорабын. Олохтоох каадырдары иитиигэ, кинилэри алмаас промышленноһыгар угуйууга улахан болҕомтобун уурабын. Ол туһунан мунньахтарга аһаҕастык хаста да эппиттээхпин.
– Итини сорох ыйытыллыбыт дьон омугумсуйуу чахчыта диэбиттэрэ, – барытын бэрт сэргэхтик истэн олорор инструктор тыл кыбытаат, бастаан, Миряев, онтон Горнаков диэки көрдө.
Онуоха аны Горнаков мүчүйэн, эттээх сонтойбут муннун ньухханна.
– Бука, эйигин бэйэбит киһибит, нуучча диэн, бэйэлэрин диэки тардарга дьулуспут буолуохтаахтар.
Инструктор тута кэҕис гынна.
– Испэр инньэ дии санаабытым. Ол гынан баран, санааларын ситэ эттиннэр диэн буойа саҥарбатаҕым. Истэн эрэ олорбутум.
– Сөпкө гыммыккын. Тугу эмэ саҥарбытыҥ буоллар, обком санаатын биллэрдэ диэхтэр этэ, – итини этээт, Миряев Горнаковка туһаайан ыйытта. – Оттон эн, Николай Дмитриевич, тугу этэрдээххин?
– Миэхэ маннык баар, һым-һым… – Горнаков көхсүн этитэн ылла, сыпсырыйан иһэ олорбут чэйдээх ыстакаанын остуолга уурда. – Сорох коммунистарыҥ этэллэринэн, эн, – Соттинцевы супту одуулуур, – Бульдокову кытта тымныытык сыһыаннаһар үһүгүн?
– Ол ордук кини өттүттэн диэххэ сөп. Мин үлэ-дьыала өттүн, туһатын көрөргө дьулуһабын. Бастаан, дьиҥэр, хайабыт да өттүттэн, оннук, тахсыылаах үлэҕэ эрэ туһуланыылаах сыһыан баара. Онтон ааспыт алтынньытааҕы пленум кэнниттэн Бульдоков ыарыйдым диэн сылтаҕыран, сымыйанан бюллетень ылан, обком пленумугар барбатаҕа партия дьиссипилиинэтигэр ханан да дьүөрэтэ суох хардыы буоларын туһунан бэйэтигэр эрэ этэн испитим. Эһиги ону хайыы сах эрдэ билбит этигит, мин ол кэпсэтиини обком ыйыытынан саҕалаабытым. Онуоха кини: «Обкомҥа ньылаҥнааҥҥын, миигин түһэн, тыллаан, хобулаан биэрэ сылдьар эбиккин дуу?!» – диэн дьорҕойбута, салгыы ханнык да быһаарыыны истэ да сорумматаҕа. Оннук улаханнык кыыһырбыт, өһүргэммит этэ. Быһыыта, балай эмэ кэм устата санаатыгар тута сылдьыбыт, көймөстүбүт, көөнньүбүт санаата тоҕу көтөн тахсыбыта. Сотору кэминэн «Соттинцев Бульдоковтан дуоһунаһын былдьаары оҥостор быһыылаах…» диэн сурах тарҕаммыта…
– Даа, кырдьык, быһыы-майгы биллэ уустугурбут эбит, – Миряев, барыта өйдөннө диэбитэ дуу, быһа түһэн, түмүк оҥордо. – Салгыы партбюроҕар хайдах үлэлиир былааннааххын?
– Тосту туора тутан, эмискэ хамсаныылары оҥорботум буолуо. Быһыыттан-майгыттан көрүөм.
– Сөп. Дьэ, көнө сүрүннээх суолу тутуһаргын уларытыма.
* * *
Чистяков кабинетын биир муннугар турар сейфэттэн халыҥ паапканы ылан, кумааҕылары бэрийэ олордоҕуна, Соттинцев киирэн кэлэн дорооболосто.
– Кыратык хойутаатым дии. Обкомҥа тардылынным.
– Сөп-сөп. Барытын билэн олоробун. Партийнай хайысхаттан уратыны ыйыппатылар ини? – Чистяков кумааҕыларын паапкаҕа хомуйа тутан сабан кэбистэ.
– Идэбит өттүн этэҕин дуо?
– Ону.
– Үһүс киһи, инструктор баар буолан, сэкирэтээрдэр ол туһунан тугу да ыйыппатылар.
– Инструктор суоҕа да буоллар, туораны ыйытыахтар суоҕа этэ. Этиканы кэспэттэр… – Чистяков мүчүйэн ылла. – Туох уларыйыылар баалларый? Бүтэһик кистэлэҥ биллэриигэр суруйбуккун толору сиһилээн быһаар эрэ.
– Уоруйахтар алмааһы, ылҕыыр фабрикаттан, илин-кэлин дьөлөҕөстөрүгэр кытары уктан тахсалларын чуолкайдаатыбыт. Билиҥҥитэ хас даҕаны дьахтары кэтэбилгэ ыллыбыт. Ону дьиэлэригэр уонна кистээн көрсүһэр сирдэригэр иһиллиир тэриллэри туруорталаан биллибит. Урут итинник тэрилэ суох хайдах үлэлии олорбуппут эбитэ буолла – улахан туһалаах тэрил буолан биэрдэ. Уорбут алмаастарын соҕуруу ыыталлар эбит. Сэрэйбиппит сөбө дакаастанна. Арменияҕа кытта илдьэллэрэ билиннэ.
– Алмааһы оннук уктан тахсалларын билэр ньыманы, анал гимнастиканы, утумнаахтык туттар туһунан дьаһалы режим кэтэбилигэр тоҕо баччааҥҥа диэри биэрэ иликкиний, табаарыс Соттинцев?
– Соруйан. Билбэтэҕэ буолабыт. Кимнээҕи кытта ситимнээхтэрин, баһылыктарын толору билээри.
– Эмиэ да сөп эбит. Барытын үөрэтэн, сэмээр кэтээн, билэн баран, биирдэ тутаттыыр сөп.
– Ити «чуумпу» ньымабытын өссө салҕаары гынабыт. Ол хайдах буолуой, табаарыс подполковник?
– Балаһыанньаттан көрүҥ. Соҕурууҥҥу сибээстэрэ толору билиннэҕинэ, куомуннаахтарын ааттара чуолкайданнаҕына, бары аадырыстара, төлөпүөннэрэ чопчуланнахтарына, олору Москуба чекистэригэр биллэриэхпит. Кинилэр оперативнай дьаһалы ылыахтара. Москубаҕа эрэ ыыталлар эбит дуу, атын республикаларга эмиэ ыыталлар эбит дуу? Арменияттан ураты?
– Дьэ, ону эбии чуолкайдыыр наада. Бэйэлэрин киһилэриттэн ким эмэ уоппускаҕа эбэтэр командировкаҕа бардаҕына, онон Москубаҕа ыыталлара билиннэ.
– Бөлөххө төһө киһи кыттарын барыллаатыгыт дуо?
– Барыллаан биллибит. Уорар бөлөх толору ахсаана сүүрбэччэни чугаһатар эбит. Фабрикаттан уоран таһаарар дьахталлар бэйэ-бэйэлэрин билсибэттэр быһыылаах. Алмаас учуокка ылыллыан, сууйуллуон-ыраастаныан иннинэ уораллар эбит. Севернэйдээҕи бөлөх баһылыга – Шагалов курдук. Кини сүрүн көмөлөһөөччүтэ, уҥа илиитэ, Мациев быһыылаах. Эбии чуолкайдыыр кэтэбили ыытабыт. Атыттары таайа эрэ саныыбыт. Биир дьиибэ түгэн үөскээтэ. Кинилэргэ Севернэй куорат милииссийэтин начальнига Шахно кыттыгастаахха дылы. Ити, билиҥҥитэ, сабаҕалааһын эрэ. Анаан үөрэтэ сылдьабыт. Иһиллээһиҥҥэ киирэн биэрэ илик. Урут сааттан-айаттан бааһыран баран үтүөрбүт, олус сэрэхтээх сур бөрө курдук киһи, – Соттинцев абаккарбыт омунугар тарбахтарын мускунан ылла.
– Оччоҕо туохха олоҕуран кинини күтүрүүгүт? – Чистяков төбөтүгэр Соттинцевтаах олус үлүһүйээри гыммыттар дуу диэн санаа охсулунна.
– Шагаловтаах Мациевы кытта куодарыһан доҕордоһор. Кинилэрдиин бииргэ бултуур, бырааһынньыктары, үгэс курдук, бииргэ атаарар.
«Ээ, суох. Уолаттар муннулара, чахчы, сыттаах эбит» дии санаата, тугу эрэ толкуйдаабыттыы, тутан олорор харандааһынан остуолун барбах табыгыратан ылла.
– Сөпкө сээбэҥниир эбиккит. Дьиэтигэр «хомурдуос» туруорбуккут дуо?
– Туруорбуппут эрээри, туһаны биэрэ илик. Атын түмсэр сирдэригэр даҕаны алмааска сыһыаннааҕы тугу да кэпсэппэттэр, наар булду-алды ахтыһаллар, анекдотунан саатыыллар. Көрсүһэр сирдэрин уларыта сылдьаллар.
– Ол аата, олус сэрэхтээхтэр эбит. «Хомурдуостары» кыбытары билэ сылдьар урдустар буолуохтаахтар. Итинник улахан уоруйахтар аныгы иһиллиир техниканан сэбилэниилэрэ олус күүстээх. Бэйэбитин иһиллии-кэтии сылдьар буоллахтарына улаханнык соһуйбаккын. Тоҕо диэтэххэ, дойду таһыттан өтөн киирбит үспүйүөннэри кытары сибээстээх буолуохтарын эмиэ сөп.
– Биһиги «хомурдуостарбытыгар» арыт Соҕуруу Африка, Израиль, Турция эҥин диэн тыллар иһиллэн ааһаллар.
Чистяков эмискэ уоттаммыт хатан хараҕа, күлүмүрдэс биилээх кынчаалы кыыныттан сулбу таһыйан таһаарбыттыы, сып-сытыытык көрүөлээн, Соттинцевы бүтүннүү быһыта сотон ыларга дылы гынна эрээри, сирэйэ син биир ымыр да гыммата. «Сымара таастан суоруллубут курдук, онно холоотооххо, мин өссө даҕаны буһа-хата, ситэ-хото иликпин быһыылаах. Өйбүн санаам бүгүстүүрэ баар буолааччы» дии санаата Соттинцев.
– Ити уорар бөлөх анал техника өттүнэн сэбилэниитин-кыаҕын туһунан «кииннэр» сэрэппиттэрэ. Арба, ол милииссийэ начальнига Шахно Саха сиринээҕи ГКСБ кэмитиэтиттэн хайа эрэ киһини кытта сибээстээх быһыылаах, ону чуолкайдааҥ диэн «киин» биһиэхэ соторутааҕыта сорудах биэрбитэ. Онон, ити өттүгэр эһиги эмиэ ылсыһаргыт ирдэнэр.
– Сөп, өйдөөтүм, табаарыс подполковник.
– Өссө ыйытыылар, этиилэр бааллар дуо? Биһиги сотору мунньахтаахпыт.
– Урукку паролларбытын уларытарбыт дуу? Баҕар, хайыы-үйэ билбиттэрэ буолуо…
– Өссө кэтэһиҥ, чуолкайдааҥ. Аныгыскы командировкаҕар диэри. Эн хаһан Севернэйдиигин?
– Бүгүн.
– Арба даҕаны, Бульдоков эйиэхэ кэлин хайдах сыһыаннаһарый?
– Ылбат-биэрбэт икки ардынан.
– Сэрэнэн сыһыаннас. Ол эрээри, урукку сыһыаҥҥын уларытыма. Быһаччы мөккүөргэ кииримэ. Сөптөөх кэмигэр, кини бэлиэтии көрөрүн курдук, үгүс өттүгэр сөбүлэґиигэ бар. Кинини аахсаргын, суолталыыргын көрдөрөргө дьулус. Бэйэтин наһаа үрдүктүк сананар, бэйэмсэх уонна бэрдимсик майгылаах. Биһиги идэлээхтэрбит оҥорбут психологическай мэтириэттэрин билсэн турар буолуохтааххын. Ону өссө төгүл үчүгэйдик үөрэт.
– Ону баара, кини биһикки ардыбытыгар алмааһы апчарыйааччылар ытаһа саайаллар быһыылаах. Кэнники кэмҥэ Шагаловтаах Мациев санааларын аһаҕастык өйүүр буолан иһэр. Ону оннооҕор мунньахтарга биллэрэн ааһыталыыр.
– Туох диэн ытаһа саайалларын билэ сатаа. Уоруйахтар кыттыгастара буолаарай? Кинини кэтиир туһунан «киин» сорудаҕа эмиэ кэлэн турар, – Чистяков кириэһилэтиттэн туран, Соттинцевка илиитин биэрдэ. – Чэ, мунньах буолара биэс мүнүүтэ хаалла. Кытаат, этэҥҥэ буол!
* * *
Ити Аппа анараа, киин диэки өттүгэр таас дьиэлэр балай эмэ тутуллан эрэллэр. Оттон бу өттүгэр таас тутуу хаһан кэлэрэ буолла?..
Ээ, кэллин да, кэлбэтин – ол миэхэ туох туһалааҕый?..
Долгуйар Дьокуускай Аппа уҥуор турар биир дьиэтин хоһугар симэн кэбиспит курдук толору эттээх-сииннээх, орто уҥуохтаах, икки дьабадьытынан намылыйан түһэр бытыктаах хара бараан киһи түннүгү одуулаан турар. Онтон эргиллэн, түннүк холуодатыгар көхсүнэн өйөннө. Өр буолбата, эмискэ биир ытыһын сутуругунан саайда.
– Тьфу-у!
Бүгүн ИДьМҥа тардыллан, Соттинцевы куоттаран кэбистэ дии! Шагаловтаах Мациев дьаһалларын толорбото. Бука, төбөтүттэн имэрийбэттэрэ буолуо? Сыыспыт. Сорудаҕы бэҕэһээ гостиницаҕа Соттинцев хоһугар арыгылыы олорон толоруохтаах этэ.
Киһи устуул кэтэҕэр ыйанан турар биир улахан сулустаах кителин сиэбиттэн кыра пакеты ылан имэрийэн, сытырҕалаан көрдө.
Оо, түбэһиннэрэн, Соттинцев арыгытыгар маны булкуйан кэбиспитэ буоллар! Этэргэ дылы, киһини кытта кини үөскэтэр кыһалҕата даҕаны сүтэр. Дьэ, хаарыан түгэн куотта. Аны Соттинцевы кытта иккиэйэҕин көрсүһэр түгэн көстөрө саарбах. Кыттыгастарбыттан туох диэммин куотунабыный? Бээ-бээ… Туох эрэ быһаарыы син биир баар буолуохтаах…
Эмискэ санаатын ситимин быһан, нөҥүө хоско төлөпүөн тырылыыр. Шахно таапачыкатын саллырҕатан тиийэн, туруупканы ылар:
– Алло? Даа, Шахно истэр, – онтон сөҥ саҥата сымнаан хаалла. – Венерабын даа? Сөп-сөп. Өйдөөтүм. Кэл-кэл, күүтэн олоробун, – туруупканы уурар.
Бу сырыыга бэрт чэпчэкитик дугунан, төттөрү хоско тиийэн, кителин кэттэ, трюмоҕа көрүннэ. Сиэркилэ ойоҕоһугар «Тет-а-тет» одеколон турарын ылан, харса суох ыстарынан тунаарытта. Астынан, муннун өрө анньан сытырҕаамахтаата, хараҕын быһыта симмэхтээтэ, баттаҕын, бытыгын тараанна.
Дьахтар аймах формалаах дьону сөбүлүүр. Ол – биллэр суол. Тоҕо диэтэххэ, поэт Александр Грибоедов эппитинии, кинилэр – патриоткалар. Һэ-һэ. Даа, арай баллаччы кэтиллибит таапычыканан сылдьара соччото суох эбит. Ону баҕас хайа даҕаны «патриотка» дьахтар сөбүлүө суоҕа.
Шахно аан хоско баран, кыра олоппоско олорон, хап-хара, килбэлдьигэс саппыкытын тиирэ кэттэ, ойон туран, хобулуктарын охсуһуннаран «тас!» гыннарда, чиккэҥнээтэ.
– Уол да уол! Ааттаах!
Ити кыыс биһиги миниистирбит ойоҕун аймаҕа буолан таҕыста дии. Ол иһин даҕаны кэмитиэккэ үлэлии киирдэҕэ. Буолаары буолан, билигин Чистяков приёмнайыгар олорор! Ол оҕо сыптарыйбыта буолбатах. Быһата, Шагаловтаах Мациев өйдөөх дьон буолаллара өссө төгүл бигэргэннэ. Мээнэ дьону тутуспаттар эбит. Кинилэр киэҥ билсиилээхтэрин Шахно чуо биллэ, өйдөөтө. Аныгы үйэҕэ билсии барыны быһаарар. Билсии – былаастааҕар күндү! Кини эрэлэ онтон олус улаатта. Дугдуруй да – оҕус! Дьиҥнээх кыайыыга диэри түптэлэтэн баран иһиэххэ!
Түннүгүнэн таһырдьаны көрөн ылла. Халлаан бороҥуйуохча буолбут.
Ол эрээри, мин билиҥҥи турукпар, арыт, саһыл буоларым булгуччулаах…
Остуолу өйдөөбөтөхтүү одууласта, ытыстарын лас гына охсунна:
– Оо, дьэ, көкөппүн ээ!
Санаата оонньууругар оҕустаран, кыыска ас тардан бэлэмниирин умнаары гыммыт дии.
Дьыбаан ойоҕоһугар турар суумкатыттан маҥан эһир көтөн иһэрин кытта бачыгырас сулус ойууламмыт дьаралыктаах бытыылканы уонна халбаһы, сыыр, сакалаат кэмпиэт, лимонад хостоон, остуолга уурталыыр. Куукунаттан килиэп, үрүүмкэ аҕалар. Холодильниктан эбии ас-үөл таһаарар.
– Дьэ, үчүгэй! Сыбаайба аһын кэриэтэ, – Шахно устунан ыллаан барар.
И эта свадьба, свадьба, свадьба пела и плясала,
И крылья эту свадьбу вдаль несли,
Широкой этой свадьбе было места мало,
И неба было мало и земли,
Широкой этой свадьбе было места мало
И неба было мало и земли…
Букатын Муслим Магомаев курдук сананан итийэн-кутуйан эрдэҕинэ, ааны тоҥсуйан тобугураттылар.
Ыллаан айаара туруо дуо, сүүрэн тиийэн:
– Кимий? – диэт, хоруйдуулларын да күүтэ сатаабакка, ааны аһа баттаата.
Онуоха Венера киирэн кэлэр. Быакаҕар биилигэр лып курдук олоро сылдьар хоҥордуҥу тирии пиджактаах, нүөл эттээх самыытын-буутун чыаппаччы тута сылдьар джинсылаах, санныгар диэри түһэ сылдьар мап-маҥан долгуннура өрүкүйбүт баттахтаах.
– Үтүө киэһэнэн!
– Үтүө эрэ буолуо дуо, чахчыта, ааттаах улуу киэһэ үүннэ эбээт! – Шахно күлүм аллайда. – Суумкаҕын, пиджаккын итиннэ ыйаа. Үлэҕэр маннык таҥнан тиийдэххинэ, эр дьон бары эн сыдьаайыҥ анныгар төкүнүйэ сытыах эбиттэр, – диэн илэ-сала түстэ, онтон дьыбааны ыйа-ыйа эттэ. – Итиннэ олоро түс. Төлөпүөҥҥэ саҥаҕынан тута билбитим. Эн саҥаҕын адьас өйдөөн хаалбыт эбиппин. Саҥаҥ кэрэ даҕаны!
– Уулуссаттан төлөпүөннээтим. Аптамааттан.
– Мала-дьыас! Аны дьиэтиттэн эрийбитэ буолуо диэммин сэрэхэдийдим ээ. Өйдөөххүн даҕаны!
– Эс, оннук судургуну оскуола оҕото да өйдүүр ини, – Венера кынтас гыммытыгар тэрэгэр түөстэрэ туналы маҥан дириҥ оҥуулаах куоптатын тиирэ тэбэн кэбиһиэхтии долгулдьуйан ыллылар. – Миигин, кэмитиэт приёмнайыгар үлэлиир киһини, иһиллээһиҥҥэ ылбыттара чахчы. Тутаах тэрилтэлэр приёмнайдарыгар үлэлээччилэр уонна тойоттор-хотуттар суоппардара агент буолалларын дьоннор кинигэттэн-киинэттэн билбиттэрэ ыраатта. Быһата, ити билигин кимиэхэ даҕаны кистэлэҥ буолбатах! – Венера оҥосто-оҥосто күлэн лыҥкынатта.
– Чэ, барыта өйдөннө. Оҕуһу тута муоһуттан харбыыр куолута! Бастаан, көрсүһүүнү бэлиэтиэххэ, – остуол аттынааҕы олоппоһу ыйар. – Баһаалыста, олорон кэбис, – хобулуктарын охсуһуннаран таһырҕатар.
– Бу төһө эрэллээх дьиэний? – Венера, сото кэбиһэн баран, унаарыччы көрөр.
– Эркин курдук эрэн. Мин чугас аймаҕым дьиэтэ. Көннөрү үлэһит. Онон, ханнык да иһиллиир тэрил суоҕа чахчы, – арыгы кутар. – Молдованнар ханньаактарын амсайыахха. «Белый аист». Биэс сулустаах. Миэхэ холооно суох. Мин биир эрэ сулустаахпын.
Венера күлэр.
– Олус кэриэлийимэ, майор! – үөһэ тыынар. – Һуу, чэпчии түстүм дии. Долгуйбутум, дьэ, ааста.
Шахно үрүүмкэтин күөрэччи көтөҕөр:
– Эрэллээх көрсүһүү туһугар! Барыта тып курдук буоллун!
Лыҥкыначчы охсуһуннаран иһэллэр.
– Аны маны амсай, – Венера тэриэлкэтигэр ас уурар.
– Мерси! Эн «оҕус» туһунан үчүгэй баҕайытык эттиҥ дии. Онон, көрсүһүүбүт сүнньүгэр киириэххэ. Туохха ыҥырдыҥ, табаарыс майор?
– Бу күннэргэ Соттинцев Чистяковка сырытта дуо?
– Сылдьан.
– Тугу кэпсэппиттэрин кистээн иһиттиҥ ини?
– Истэн.
– Биһиэхэ, севернэйдэргэ, сыһыаннааҕы хобугунастылар дуо?
– Сибигинэстилэр, санааларыгар… – Венера хараҕынан оонньоон ылла.
– Сүрүн ис хоһоонун иһитиннэр эрэ.
– Алмааһы кимнээх уоралларын туһунан санааларын үллэһиннилэр. Онно күтүрүүр дьоннорун ортотугар Мациев, Шагалов ааттара иһилиннилэр… Уонна Шахно, – дьахтар уп-уһун тыҥырахтаах сөмүйэтинэн эр киһини супту ыйан кэбистэ.
Шахно өрө тыынар:
– Чопчу хайыахпыт дииллэрий?
– Алмааһы уорааччылар тэрээһиннээх бөлөхтөрүн эһиги үс салайар үһүгүт. Ол эрээри, эһигини тутарга чопчу дакаастабыллар суохтар эбит. Инньэ гынан, Чистяков «салгыы кэтээҥ» диэн сорудах биэрдэ. Онон муҥутуурдук сэрэнииһигит.
Эдэр дьахтар куба маҥан илиитин ууруу-ууруу, Шахно саҥаран суккуйда:
– Оо, биһиги эрэллээх араҥаччыһыппыт! Улуу көмөнү оҥорбуккун! Севернэйгэ тиийээт, дьоммор этиэм. Өссө төгүл барҕа махтал буолуохтун! Ити туһугар биирдии үрүүмкэтэ тэп гыннарыах, – диэт, ойон туран, үрүүмкэлэргэ арыгы кутуталаата. – Чэ, соргулаах буолар туһугар! Табыллыы туһугар!
Охсуһуннараллар. Шахно биир тыынынан түһэрэн кэбиһээт, халбаһыны ылан ыстаан ыллаҥнатар. Кини мэйиитигэр туох эрэ атын санаа баар курдук.
Венера уоһун эрэ барбах сиигирдэн баран, үрүүмкэтин оннугар туруорар.
– Махталыҥ итинэн бүттэ дуо? – үрүүмкэлэри ыйар, күлэр.
Шахно ыстыы олорбутун тиэтэйбиттии ыйыстан дьүккүк гыннара-гыннара, илиитин көтөҕөр.
Конец ознакомительного фрагмента.
Текст предоставлен ООО «Литрес».
Прочитайте эту книгу целиком, купив полную легальную версию (https://www.litres.ru/chitat-onlayn/?art=70614577) на Литрес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.